2023 جىلى الماتىدا تۋريزم باسقارماسى تۋريستىك ينفراقۇرىلىمدى اباتتاندىرۋ بويىنشا جۇمىس جۇرگىزدى. بۇل تۋرالى الماتى قالاسى تۋريزم باسقارماسىنىڭ باسشىسى عاليا توقسەيىتوۆا مالىمدەدى.
اتاپ ايتقاندا، «اقبۇلاق»، «ۇاك» جانە «مىڭجىلقى» 3 كەمپينگ-ايماعى ورناتىلدى، وندا شاتىرلار، جايلى بەسەدكالار، ۇستەل-ورىندىقتار، اتكەنشەكتەر پايدا بولدى. سونىمەن قاتار، ۇزىندىعى 150 كم بولاتىن 12 تاۋ باعىتى اباتتاندىرىلدى، وندا اقپاراتتىق ستەندتەر، كورسەتكىشتەر، دەمالۋعا ارنالعان پلاتفورمالار، كوپىرلەر مەن بەسەدكالار ورناتىلدى.
«سونىمەن بىرگە، الماتى حالىقارالىق اۋەجايىنىڭ پاسپورتتىق باقىلاۋ ايماعىنداعى كابينالاردى جابدىقتادىق. ەندى تۋريستەردى الەمگە بەلگىلى توعىز تىلدە، سونىڭ ىشىندە قازاق، ورىس، اعىلشىن، اراب، جۇڭگو، فرانسۋز، يتاليان، تۇرىك جانە كورەي تىلىندە قارسى الادى. الماتى قالاسىنىڭ اۋەجايىندا تاكسيستەردىڭ زاڭسىز ىس-ارەكەتتەرىنىڭ جيىلەۋىنە بايلانىستى الماتى قالاسىنىڭ حالىقارالىق اۋەجايىنىڭ تەرمينالدارىندا تاكسي تاريفتەرى كورسەتىلگەن اقپاراتتىق ستەندتەر ءىلىندى، سونىمەن بىرگە كەدەندىك باقىلاۋ ايماعىندا شەتەلدىك ازاماتتاردىڭ پاسپورتتارىنا اقپاراتتىق قوسىمشا پاراقتار بەرۋ كوزدەلگەن»، - دەدى عاليا توقسەيىتوۆا.
بۇعان قوسا، قالا قيىلىستارىندا 54 اقپاراتتىق توتەم جاڭارتىلدى. قالا كارتاسىمەن قوسا، ولار تانىمال تۋريستىك ورىندارعا باعىتتاردى ۇسىنادى. سونىمەن قاتار، بىلتىر ۆيرتۋالدى 3D تۋرلار باستالدى. ەندى visitalmaty.kz سايتىنداعى الەمنىڭ كەز كەلگەن جەرىندە پايدالانۋشىلارعا تەگىن اۋديو-بەينە تۋرلار قولجەتىمدى.
«ءوز كەزەگىندە، ءبىز قالا تۇرعىندارى مەن قوناقتارىنان مادەنيەتتى بولۋدى، ينفراقۇرىلىم نىساندارىنا ايالاپ ۇقىپتى قاراۋدى جانە ۆانداليزم فاكتىلەرىنە جول بەرمەۋدى سۇرايمىز»، - دەدى تۋريزم باسقارماسىنىڭ باسشىسى.
2024 جىلى تۋريستىك ينفراقۇرىلىمدى جاقسارتۋ جانە دامىتۋ جونىندەگى جۇمىستار جالعاسادى، ونىڭ ىشىندە كەمپينگ-ايماقتار ورناتىلىپ، تاۋ جولدارى اباتتاندىرىلادى.