ۇكىمەتتە ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن كەڭەستە 5G تەحنولوگياسىن ەنگىزۋ جانە شالعاي ەلدى مەكەندەردەگى مەكتەپتەردى جوعارى جىلدامدىقتى ينتەرنەتپەن قامتاماسىز ەتۋ ماسەلەلەرى تالقىلاندى.
سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين بۇگىندە استانا، الماتى، شىمكەنت قالالارىندا جانە وبلىس ورتالىقتارىندا بايلانىس وپەراتورلارىنىڭ 800-دەن استام 5G بازالىق ستانساسى ورناتىلعانىن باياندادى، دەپ حابارلايدى Almaty-akshamy.kz.
Primeminister.kzء-تىڭ مالىمەتىنشە، بۇل رەتتە تەحنولوگيانى ەنگىزۋدى جەدەلدەتۋ ءۇشىن بايلانىس ستانسالارىن ىسكە قوسۋ مەرزىمىنە ايتارلىقتاي اسەر ەتەتىن رەتتەۋشى ءبىرقاتار كەدەرگىلەردى جويۋ قاجەت. بۇل جابدىقتى مونتاجداۋ راسىمدەرىن جەڭىلدەتۋگە، سانيتاريالىق ەرەجەلەردى حالىقارالىق ستاندارتتارعا سايكەستەندىرۋگە، جەر تەلىمدەرىن ۋاقتىلى بەرۋگە جانە ت.ب. قاتىستى.
ءاليحان سمايىلوۆ مەملەكەت باسشىسىنىڭ تاپسىرماسىنا سايكەس رەسپۋبليكالىق ماڭىزى بار قالالار مەن وبلىس ورتالىقتارىندا 5G جەلىسىن ەنگىزۋ جۇمىستارى 2025 جىلدىڭ سوڭىنا دەيىن اياقتالۋى ءتيىس ەكەنىن ەسكە سالدى. وسىعان بايلانىستى پرەمەر-مينيستر ارتىق اكىمشىلىك كەدەرگىلەردى جەدەل جويىپ، حالىقتى ساپالى جوعارى جىلدامدىقتى ينتەرنەتپەن قامتاماسىز ەتۋ قاجەتتىگىن باسا ايتتى.
جالپى، وسىلايشا، رەسپۋبليكانىڭ شالعاي ەلدى مەكەندەرىندەگى 2000 ءبىلىم بەرۋ نىسانىن جوعارى جىلدامدىقتى ينتەرنەتكە قوسۋ جوسپارلانىپ وتىر. اتالعان جۇمىس شەڭبەرىندە ءتيىستى جابدىقتاردى جەتكىزۋ جانە ولارعا تەحنيكالىق قىزمەت كورسەتۋ جۇزەگە اسىرىلاتىن بولادى.
پرەمەر-مينيستر زاماناۋي بايلانىس جەلىلەرىن ەنگىزۋمەن قاتار اۋىل مەكتەپتەرىنە ارنالعان ءبىلىم بەرۋ باعدارلامالارىن دامىتۋعا نازار اۋدارۋ قاجەت ەكەنىن باسا ايتتى. اتاپ ايتقاندا، جاڭا سيفرلىق فورماتتار مەن تاسىلدەر ارقىلى وقۋشىلاردىڭ بەلسەندىلىگىن جانە جالپى ءبىلىم بەرۋ ۇدەرىسىنىڭ تيىمدىلىگىن ارتتىرۋعا بولادى.