Almaty-akshamy.kz سايتىندا بۇگىن جاريالانعان جاڭالىقتارعا شولۋ – كۇن كەرۋەنى
جەر ءدۇمپۋى باسىلماي جاتىر...
24 قاڭتار كۇنى تاڭەرتەڭ الماتىدان 212 شاقىرىم جەردە تاعى دا جەر سىلكىنىسى بولدى. جەر سىلكىنىسىنىڭ ەنەرگەتيكالىق كلاسى 10،3 بولدى. ماگنيتۋداسى – 4،4. جەر سىلكىنىسى 10 شاقىرىم تەرەڭدىكتە بولدى. قازاقستان اۋماعىندا جەر سىلكىنىسى سەزىلگەن جوق، الماتىلىقتار ءدۇمپۋدى سەزگەن جوق. سەيسمولوگتار تاڭعى ساعات 7:35-تە الماتىدان وڭتۇستىك-شىعىسقا قاراي 250 شاقىرىم جەردە قىرعىزستان مەن جۇڭگو شەكاراسىندا كەزەكتى جەر سىلكىنىسىن تىركەدى. الماتىلىقتار مۇنى دا سەزگەن جوق.
بۇدان كەيىن الماتى ۋاقىتى بويىنشا ساعات 14:03-تە بارلىعى بەس جەر سىلكىنىسى تىركەلدى. سوڭعى جەر سىلكىنىسىنىڭ وشاعى الماتىدان وڭتۇستىك-شىعىسقا قاراي 271 شاقىرىم جەردە جۇڭگو اۋماعىندا ورنالاسقان. ماگنيتۋداسى - 4،7.
ءتىلسىز جاۋ دا جاعالاسىپ...
الماتى وبلىسى توتەنشە جاعدايلار دەپارتامەنتىنىڭ مالىمەتىنشە، بۇگىن تاڭعى ساعات 7 شاماسىندا كەزەكشى بولىمگە ىلە اۋدانىنىڭ پەرۆوماي ونەركاسىپ ايماعىندا مەتالل كونسترۋكسيالارىنان جاسالعان، اۋماعى 3600 شارشى مەتر بولاتىن پوليەتيلەن تاۋارلارى ساقتالعان قويمادان ءورت شىقتى. زارداپ شەككەندەر جوق.
ءورتتى سوندىرۋگە الماتى وبلىسى تجد 37 قىزمەتكەرى مەن 14 تەحنيكاسى جانە الماتى قالاسىنان 22 مامان مەن 4 ءورت ءسوندىرۋ ماشيناسى جۇمىلدىرىلدى.
ءورتتىڭ كەسىرىنەن الماتىنى قارا ءتۇتىن باستى
ساعات 7:00-دەن 9:20-عا دەيىن قارا ءتۇتىن كوتەرىلىپ، بىرنەشە شاقىرىمعا سوزىلدى، جەلدىڭ ازدىعىنان ءتۇتىن باياۋ ءوتىپ، قالا شەگىنە شامامەن 3 ساعات بويى تارادى.
الماتى قالاسىنىڭ ەكولوگيا جانە قورشاعان ورتا باسقارماسىنىڭ مالىمەتىنشە، قالانىڭ سولتۇستىك بولىگىندە اتموسفەرالىق اۋانىڭ ناشارلاۋىنا جانە قارا ءتۇتىننىڭ پايدا بولۋىنا ىلە اۋدانىنداعى ءبىرىنشى مامىر ونەركاسىپتىك ايماعىنداعى ءورت سەبەپ بولدى.
كوبەي، قازاق!
بۇعان دەيىن ءۇش بالاسى بار استانالىق كەلىنشەك ۇشەم بوساندى. سابيلەردىڭ اناسى اجار قابيتوۆا جۇبايىمەن بىرگە 2020 جىلى دۇنيەگە كەلگەن قىزدارى مەن 2022 جىلى تۋعان ەگىز بالالارىن تاربيەلەپ وتىر. ۇشەمنىڭ ءبارى – ۇل. بالالاردىڭ سالماعى – 3 مىڭ، 2 300 جانە 2 500 گرامم. جاڭا تۋعان نارەستەلەر ءبىر اپتاعا جۋىق ۋاقىتتان بەرى №2 قالالىق كوپسالالى اۋرۋحانادا جاتىر.
استانالىق ۇشەمدەردىڭ ۇشەۋى دە ۇل بولسا، سارىعاشتىق جاس انا گۇلميرا داۋربايەۆا ءۇش قىزدى دۇنيەگە اكەلدى. ءسويتىپ، سارىاعاشتىق باتىر انا بۇگىن 8 بالانىڭ اناسى اتاندى. مەرزىمىنەن بۇرىن دۇنيە ەسىگىن اشقان نارەستەلەرگە جانساقتاۋ ءبولىمىنىڭ ماماندارى تاراپىنان ەرەكشە كۇتىم جاسالعان.
20 مينۋتتا جسن الاسىڭ!
ەندى ەلىمىزدە جاڭا تۋعان بالاعا بىردەن جسن بەرىلەدى، بۇرىن بۇل پيلوتتىق جوبا بولعان.
ءماجىلىس بايلانىس، سيفرلاندىرۋ جانە اقپاراتتاندىرۋ سالاسىنىڭ ينۆەستيسيالىق احۋالىن ارتتىرۋ ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى.
بايلانىسىمىز ۆيرتۋالدى بولا ما؟
ءماجىلىستىڭ جالپى وتىرىسىندا تالقىلانعان زاڭ جوباسى بويىنشا، قازاقستاندا ۆيرتۋالدى ۇيالى بايلانىس وپەراتورىن ەنگىزۋ قاراستىرىلىپ جاتىر. ءقازىر ۆيرتۋالدى بايلانىس وپەراتورىن پايدالانۋ بويىنشا حالىقارالىق تاجىريبە قالىپتاسقان. ولار ءقازىر جۇمىس ىستەپ تۇرعان بايلانىس وپەراتورلارىنان ترافيكتى جالعا الادى. امبەباپ SIM-كارتاسى جاقىن تۇرعان كەز كەلگەن انتەننادان بايلانىس سيگنالىن الادى. مۇنداي كارتالاردىڭ تاريفتەرى ءبىرشاما قىمباتىراق بولادى، سونداي-اق بۇكىل ەل بويىنشا ۇزدىكسىز بايلانىسقا مۇمكىندىك جاسالادى.
«كارى قۇداڭ الەك سالدى...»
اۋا رايىنىڭ قولايسىزدىعى كەسىرىنەن 2 وبلىستاعى رەسپۋبليكالىق ماڭىزى بار اۆتوجولداردا اۆتوكولىكتىڭ بارلىق تۇرلەرى ءۇشىن قوزعالىسقا شەكتەۋ ەنگىزىلدى. ءقازىر اۆتوجولداردى كۇتىپ-ۇستاۋعا 648 تەحنيكا مەن1381 جول قىزمەتكەرى جۇمىلدىرىلدى.
ۆەيپ ءۇشىن 5 جىلعا سوتتالاسىڭ!
ەلىمىزدە ەلەكتروندى تەمەكىلەردى تاسىمالداۋعا، وندىرۋگە جانە ساتۋعا تىيىم سالاتىن زاڭدى بۇگىن ءماجىلىس دەپۋتاتتارى ەكىنشى وقىلىمدا ماقۇلدادى
زاڭدا ۆەيپتەردى زاڭسىز اينالىمعا جىبەرگەنى ءۇشىن قىلمىستىق جاۋاپكەرشىلىك قاراستىرىلعان:
ۆەيپ ساتقانى ءۇشىن ەڭ اۋىر جازا - 50 تاۋلىككە دەيىن قاماۋعا الۋ؛
اكەلۋ جانە تاراتۋ ءۇشىن – 2 جىلعا دەيىن باس بوستاندىعىنان ايىرۋ؛
قىلمىستىق توپ جاساعان نە اسا iرi مولشەردە نە بiرنەشە رەت جاسالعان ءدال سول ارەكەتتەر ءۇشiن - 5 جىلعا دەيiنگi مەرزiمگە باس بوستاندىعىنان ايىرۋعا جازالانادى.
ۇبت تاپسىرۋشىلارعا كالكۋلياتور مەن حيميالىق كەستە بەرىلەدى
ۇلتتىق ءبىرىڭعاي تەستىلەۋدى ەلەكتروندى فورماتقا اۋىستىرعاننان كەيىن تەست تاپسىرۋشىلارعا كالكۋلياتور، حيميالىق ەلەمەنتتەردىڭ پەريودتىق جۇيەسى جانە تۇزداردىڭ ەرىگىشتىك كەستەسى قولجەتىمدى بولدى. سونىڭ ناتيجەسىندە ولار تەستىلەۋ باعدارلاماسىنا ەنگىزىلگەن. ونى تەستىلەۋ اكىمشىلەرى ۇبت تاپسىراتىن اۋديتوريادا بەرەتىن بولادى. ياعني، تەستكە قاتىسۋشىلار وزدەرىمەن بىرگە الىپ كەلمەيدى. وسىلايشا، تالاپكەرلەر كەستەلەردىڭ ەلەكتروندىق فورماتىن دا، قاعاز فورماتىن دا قولدانا الادى.
سۋارۋ ماۋسىمىنا دايىندىق باستالدى
دايىندىق اياسىندا توپىراق قۇرامىنداعى ىلعال مولشەرىن ارتتىرۋ بويىنشا ءىس-شارالار جۇرگىزىلىپ جاتىر. بۇگىنگى تاڭدا 12 مىڭ گەكتارعا نەمەسە سۋارمالى القاپتىڭ 25 پايىزىندا ىلعالداتۋ جۇمىسى جۇرگىزىلدى. ال، جەتىساي اۋدانىندا ىلعالداتۋ جوسپارلانعان 54 مىڭ گەكتاردىڭ 10 مىڭ گەكتارىنا (19%) سۋ بەرىلدى.
ءمينيستردىڭ كوزقاراسىن ايقىنداعان...
بالايەۆا باق-تىڭ ءرولىن الماتىدا بولعان جەر سىلكىنىسىنە بايلانىستى باعالادى.
«مادەنيەت جانە اقپارات مينيسترلىگى جاقىن ارادا توتەنشە جاعدايلار كەزىندە ب ا ق پەن الەۋمەتتىك جەلىلەر جۇمىستارىنىڭ ەگجەي-تەگجەيلى الگوريتمىن ۇسىنباق. سونداي-اق، ءبىز توتەنشە جاعدايلار مينيسترلىگى، دەنساۋلىق ساقتاۋ مينيسترلىگى، ەڭبەك جانە حالىقتى الەۋمەتتىك قورعاۋ مينيسترلىگى، ىشكى ىستەر مينيسترلىگى جانە باسقا دا مۇددەلى مەملەكەتتىك ورگاندار وكىلدەرىنىڭ قاتىسۋىمەن ب ا ق قىزمەتكەرلەرى ءۇشىن ءبىرقاتار وقۋ ترەنينگتەرىن وتكىزۋدى جوسپارلاپ وتىرمىز. ترەنينگ اياسىندا قاتىسۋشىلار توتەنشە جاعدايلاردا، ميتينگىلەردە، ءورت كەزىندە، جازاتايىم وقيعالار مەن بالالاردىڭ قاتىسۋىمەن بولعان فاكتىلەردى جاريالاۋعا قاتىستى قاجەتتى ۇسىنىستار مەن نۇسقاۋلاردى الا الادى. بۇقارالىق اقپارات قۇرالدارىنىڭ جۇمىسى تەك وبەكتيۆتى جانە ۋاقىتىلى اقپارات تاراتۋ عانا ەمەس، كەيدە ادامداردىڭ ءومىرى مەن دەنساۋلىعى ءۇشىن دە جاۋاپتى ەكەنىن ءبىلۋ ماڭىزدى»، دەپ جازدى ايدا بالايەۆا ءوزىنىڭ Facebook پاراقشاسىنا.