تاۋەلسىزدىك كۇنى ومىرگە كەلگەن سابيلەر
قازاقستاندا 16-17 جەلتوقسان – تاۋەلسىزدىك مەرەكەسى كۇندەرى دۇنيەگە كەلگەن 2 مىڭنان استام سابيگە baby-بوكستار سىيعا تارتىلدى. بۇل تۋرالى ق ر سيفرلىق دامۋ، يننوۆاسيالار جانە اەروعارىش مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى Almaty-akshamy.kz.
بۇعان دەيىن جازعانىمىزداي، تاۋەلسىزدىكتىڭ 30 جىلدىق مەرەيتويىنا وراي بەرىلگەن «ءسۇيىنشى» سىيقورابىنا بوبەكتەرگە قاجەتتى زاتتاردان باسقا، ق ر پرەزيدەنتى قاسىم-جومارت توقايەۆتىڭ قۇتتىقتاۋ تىلەگى جازىلعان اشىق حات، «تاۋەلسىز قازاقستانعا 30 جىل» مونەتاسى جانە بالانىڭ تۋۋى تۋرالى كۋالىگى سالىنعان.
«اينالايىن، بوبەك! سەنىڭ تۋعان كۇنىڭ ەلىمىزدىڭ ەڭ باستى مەرەكەسىمەن تۇسپا-تۇس كەلدى. ءوزىڭ دۇنيە ەسىگىن اشقان كەزدە حالقىمىز قاستەرلى تاۋەلسىزدىگىنىڭ 30 جىلدىعىن اتاپ ءوتىپ جاتتى. ساعان باقىتتى ءارى ۇزاق عۇمىر تىلەيمىن!»، - دەپ جازىلعان پرەزيدەنتتىڭ قۇتتىقتاۋىندا.
16 جانە 17 جەلتوقساندا تۋعان بالالارعا تۋۋ تۋرالى كۋالىكتى الۋ تۋرالى وتىنىمدەردى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ قىزمەتكەرلەرى قابىلداپ، ءارى قاراي قازاقستان ازاماتىنىڭ العاشقى قۇجاتىن رەسىمدەۋ ءۇشىن احاج ورگاندارىنا جولدادى.
«ءسۇيىنشى» سىيقوراپتارىن ق ر سيفرلىق دامۋ، يننوۆاسيالار جانە اەروعارىش مينيسترلىگى «ازاماتتارعا ارنالعان ۇكىمەتپەن بىرگە جانە ق ر ۇلتتىق بانك، سەنتركرەديت بانكى جانە «قازپوشتا» اق قاتىسۋىمەن ۇيىمداستىردى.