سايلاۋ ناۋقانىنىڭ ناتيجەلەرى
پرەزيدەنتتىككە كانديدات سالتانات تۇرسىنبەكوۆا سايلاۋالدىنداعى ۇگىت-ناسيحات ناۋقانىندا 12 وبلىستا بولدى. ول استانا، شىمكەنت جانە الماتى قالالارىندا، اقمولا، اتىراۋ، شىعىس قازاقستان، قاراعاندى، قوستاناي، ماڭعىستاۋ، پاۆلودار، سولتۇستىك قازاقستان، تۇركىستان وبلىستارىندا تۇرعىندارمەن، حالىقتىڭ ءارتۇرلى توپتارىمەن كەزدەسۋ وتكىزدى.
استانا
21 قازاندا كانديداتتىڭ شتابىندا ۇيىمداستىرۋ كوميتەتىنىڭ وتىرىسى ءوتتى. قاتىسۋشىلار دايىندىق جۇمىسىنداعى جاعدايدى، سونداي-اق الداعى جوسپارلاردى تالقىلادى.
22 قازاندا رەسپۋبليكالىق شتابتىڭ رەسمي اشىلۋى ءوتتى. رەسپۋبليكالىق شتابقا بەينەبايلانىس ارقىلى ايماقتىق بولىمشەلەر قوسىلدى. كەزدەسۋ بارىسىندا ۇگىت-ناسيحات جۇمىستارىن جۇرگىزۋ ماسەلەلەرى، الداعى جوسپارلار، سونداي-اق كانديداتتىڭ سايلاۋالدى باعدارلاماسى تالقىلاندى.
23 قازاندا كانديداتتىڭ ءوزى استانا قالاسىنىڭ كوشەلەرىنە ءوزىنىڭ العاشقى ۇگىت-ناسيحات پلاكاتىن جاپسىرۋ ءۇشىن شىققان بولاتىن. وسىلايشا، ەل استاناسى مەن وڭىرلەرىندە شتاب كوماندالارى ىسكە قوسىلدى.
24 قازاندا كانديدات قۇقىق قورعاۋشىلارمەن كەزدەستى. سالتانات تۇرسىنبەكوۆا ناشاقورلىق، قۇمار ويىندار مەن ماسكۇنەمدىك، تۇرمىستىق زورلىق-زومبىلىق پەن سىبايلاس جەمقورلىق سياقتى ماسەلەلەردىڭ كەڭ ەتەك جايۋىنا جول بەرۋگە بولمايتىنىن ايتتى.
25 قازاندا ول رەسپۋبليكا كۇنىنە ارنالعان چەللەندج اياسىندا قولىنا ەلىمىزدىڭ تۋىن كوتەرىپ، جۇگىردى.
قاراعاندى
26 قازاندا كانديدات سايلاۋالدى ۇگىت-ناسيحات جۇمىستارى اياسىندا ايماقتاردى ارالاۋدى باستادى. العاشقى ءوڭىر قاراعاندى وبلىسى بولدى.
قاراعاندىدا كانديدات قۇقىق قورعاۋشىلارمەن، زاڭگەرلەرمەن، ءتۇرلى ۇكىمەتتىك ەمەس ۇيىمداردىڭ وكىلدەرىمەن كەزدەستى. كەزدەسۋ بارىسىندا كانديدات ءوزىنىڭ تەلەفون ءنومىرىن كوپشىلىككە جاريالادى. حالىق مۇگەدەكتەردىڭ ماسەلەسىنە، ساياسي وزگەرىستەر قاجەتتىگىنە شاعىمدانىپ، ونىڭ ءولىم جازاسىنا دەگەن كوزقاراسىن سۇرادى.
ودان كەيىن ۇمىتكەر تۇرمىستىق زورلىق-زومبىلىق قۇرباندارىنا كومەك كورسەتۋ ورتالىعىندا بولدى.
كوكشەتاۋ
27 قازان كۇنى قۇقىق قورعاۋشى كوپسالالى وبلىستىق اۋرۋحانادا بولىپ، دارىگەرلەر مەن مەديسينا قىزمەتكەرلەرىنىڭ ماسەلەلەرىن تىڭدادى. مەديسينا قىزمەتكەرلەرىمەن كەزدەسۋدە تۇرسىنبەكوۆا دارىگەرلەردىڭ قاتەلىكتەرىن دەكريمينيزاسيالاۋ تۋرالى ايتتى. مەديسينالىق مەكەمەلەردى قارجىلاندىرۋدىڭ ازدىعى دا دارىگەرلەردى الاڭداتىپ وتىر.
سول كۇنى پرەزيدەنتتىككە ۇمىتكەر سالتانات تۇرسىنبەكوۆا «شانس» داعدارىس ورتالىعىندا بولدى. قۇقىق قورعاۋشى ايەلدەردى ءۇمىتىن ۇزبەۋگە جانە بەرىلمەۋگە – وزدەرى جانە بالالارى ءۇشىن سوڭىنا دەيىن كۇرەسۋگە شاقىردى.
استانا
28 قازاندا سالتانات تۇرسىنبەكوۆا ەلوردادا كوپ بالالى انالارمەن كەزدەستى. كوپ بالالى وتباسىلاردىڭ بارىنە بەلگىلى قيىن قارجىلىق جاعداي، باسپانا ماسەلەسى جانە بالالاردى وقىتۋدى ۇيىمداستىرۋ، قارىز جۇكتەمەسى ماسەلەلەرىن كوتەردى.
29 قازاندا تۇرسىنبەكوۆا جەكەمەنشىك جانۋارلارعا ارنالعان پاناحانادا بولىپ، جانۋارلارعا قامقورلىق جاساۋ كەرەكتىگىن ايتتى.
مۇندا مىنا ماسەلەلەر كوتەرىلدى:
- جانۋارلارعا جاۋاپكەرشىلىكپەن قاراۋ تۋرالى 2021 جىلى قابىلدانعان زاڭ جۇمىس ىستەمەيدى؛
- ءۇيسىز جانۋارلارعا ارنالعان قوعامدىق پيتومنيكتەر ءىس جۇزىندە جوق؛
- جانۋارلارعا جاناشىرلىقپەن قاراۋ؛
- قارجىلاندىرۋدىڭ تاپشىلىعى؛
- جانۋارلارعا قايىرىمدىلىقتىڭ جەتكىلىكسىزدىگى.
شىمكەنت
ۇمىتكەر 31 قازاندا شىمكەنتتە تىگىن فابريكاسىنىڭ 250 جۇمىسشىسىمەن اڭگىمەلەسىپ، جۇمىس ىستەيتىن ايەلدەردىڭ زەينەت جاسىن تومەندەتۋ ماسەلەسىن كوتەردى. جۇمىسشىلار تابىس تەڭسىزدىگىنە شاعىمداندى.
سودان كەيىن ول قالالىق ادۆوكاتتار القاسىمەن كەزدەستى. ادۆوكاتتار اتىشۋلى ىستەردى جاريالايتىن جۋرناليستەردىڭ ادىلەتسىز سوتتارى مەن قىسىمىنا نارازى. كانديدات ءوز باعدارلاماسىندا ءبىرىنشى باعىت رەتىندە سوت-قۇقىقتىق رەفورمانى ەرەكشە اتاپ وتكەنىن ەسكە سالدى.
كەيىنىرەك ۇمىتكەر 2017 جىلى ءوزىنىڭ «تۇرمىستىق زورلىق-زومبىلىقسىز قازاقستان» جوباسىنىڭ ارقاسىندا قۇرىلعان وتباسىن قولداۋ قىزمەتىنە باردى.
تۇركىستان
تۇرسىنبەكوۆا 1 قاراشادا تۇركىستان وبلىسىندا بولدى. مۇندا ول ەڭ الدىمەن 1100-گە جۋىق ادام ەڭبەك ەتەتىن كەنتاۋ ترانسفورماتور زاۋىتىندا بولدى. حالىق باعانىڭ وسۋىنە، تابىستىڭ تومەندىگىنە شاعىمدانىپ، ۇمىتكەرگە زەينەت جاسىن تومەندەتۋ تۋرالى ۇسىنىسىنا العىستارىن ءبىلدىردى.
ۇمىتكەر سول كۇنى تۇركىستان قالاسىنداعى «شاپاعات» مۇمكىندىگى شەكسىز ادامدار قوعامداستىعىنىڭ «عيززات» موتيۆاسيالىق ورتالىعىندا بولدى. تۇرعىندار جۇمىسقا ورنالاسۋداعى قيىندىقتارعا، جاردەماقىلاردىڭ تومەندىگىنە، وڭالتۋ ماشينالارىن پاتەنتتەي الماي جۇرگەندەرىنە شاعىمداندى.
الماتى
3-6 قاراشا ارالىعىندا سالتانات تۇرسىنبەكوۆا الماتىدا ءتۇرلى كەزدەسۋلەر وتكىزدى: تۇتىنۋشىلاردىڭ قۇقىقتارىن، زياتكەرلىك مەنشىكتى قورعاۋ ماسەلەلەرى بويىنشا ازاماتتارمەن، قالالىق قۇقىق قورعاۋشىلارمەن جانە قوعامدىق پىكىر كوشباسشىلارىمەن، قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرىمەن، سونداي-اق «رودنيك» داعدارىس ورتالىعىنىڭ باسشىسىمەن كەزدەستى.
سونىمەن قاتار، ۇمىتكەر «تاۋەلسىزدىك تاڭى» مونۋمەنتىنە گۇل شوقتارىن قويىپ، جەلتوقسان وقيعاسى قۇرباندارىن ەسكە الدى.
قوستاناي
8 قاراشادا سالتانات تۇرسىنبەكوۆا قوستاناي قالاسىندا بىرنەشە كەزدەسۋ وتكىزدى. ەڭ الدىمەن №4 ەمحاناعا باردى. ەمحانا قىزمەتكەرلەرى جالاقىنىڭ ازدىعى مەن كادر تاپشىلىعى ماسەلەلەرىن ورتاعا سالسا، ەمدەلۋشىلەر دارى-دارمەك باعاسىنىڭ قىمباتتاۋىنا جانە اۋرۋحاناعا جازىلۋداعى قيىندىقتارعا شاعىمداندى.
ودان كەيىن كانديدات قۇقىق قورعاۋشىلارمەن جانە زاڭگەرلەرمەن كەزدەسۋ وتكىزدى. وندا ول ەلدەگى باسشىلىق لاۋازىمدارداعى ايەلدەر وكىلدىگىنىڭ تومەندىگى تۋرالى، سونداي-اق پارتيالىق تىزىمدە ايەلدەردىڭ نەمەسە جاستاردىڭ كەم دەگەندە 30% بولۋى كەرەك دەگەن كۆوتامەن كەلىسپەۋشىلىك تۋرالى ايتتى.
اقتاۋ
تۇرسىنبەكوۆا 13 قاراشا كۇنى اقتاۋ قالاسىنداعى جالعىزباستى انالارمەن كەزدەسۋ وتكىزدى. قۇقىق قورعاۋشى وندا ەر-ازاماتتاردىڭ اليمەنتتەن جالتارۋ ماسەلەسىن كوتەردى. كانديدات ايتقانداي، جالعىزباستى انالار «اليمەنت سۇراپ، بۇرىنعى كۇيەۋى مەن بىرگە تۇراتىن ادامداردىڭ سوڭىنان جۇگىرمەۋى» كەرەك.
سول كۇنى ۇمىتكەر Yessenov University وقىتۋشىلارىمەن، ستۋدەنتتەرىمەن جانە تۇلەكتەرىمەن كەزدەسىپ، اۋىل جاستارىنا جاعداي جاساۋ قاجەتتىگىن ايتتى.
اتىراۋ
14 قاراشادا سالتانات تۇرسىنبەكوۆا قازاقستانداعى انا مەن بالا ءولىمى تاقىرىبىنا ارنالعان جيىن وتكىزدى. كەزدەسۋ اتىراۋدا ءوتتى.
كانديدات انا مەن بالا ءولىمىنىڭ دەڭگەيى ەلىمىزدىڭ بۇكىل مەديسيناسىنىڭ دامۋىن سيپاتتايتىن ماڭىزدى كورسەتكىشتەردىڭ ءبىرى ەكەنىن اتاپ ءوتتى. «ءاربىر ايەل مەن ءسابيدىڭ ءومىرى ءۇشىن كۇرەسۋ كەرەك»، دەپ ەسەپتەيدى تۇرسىنبەكوۆا.
وسكەمەن
15 قاراشادا سالتانات تۇرسىنبەكوۆا ەلىمىزدىڭ شىعىسىندا بولدى.
العاشقى كەزدەسۋ جەرگىلىكتى ەكولوگيا سالاسىنىڭ بەلسەندىلەرمەن ءوتتى. تۇرسىنبەكوۆانىڭ ايتۋىنشا، اۋانىڭ لاستانۋى بويىنشا وسكەمەن، ريددەر جانە زىريان قالالارى ءارقاشان الدىڭعى قاتاردا تۇرادى. اتموسفەرالىق اۋانى لاستاۋدىڭ نەگىزگى كوزى 370-تەن استام كاسىپورىننان شىعاتىن قالدىقتار بولىپ تابىلادى.
كەيىن تۇرسىنبەكوۆا قۇقىق قورعاۋشىلارمەن كەزدەسىپ، ولارمەن مەكتەپتەگى بۋللينگ تاقىرىبىن تالقىلادى. قازاقستانداعى يۋنفپا مالىمەتى بويىنشا، ەلدە بالالاردىڭ 63%-ى زورلىق-زومبىلىق پەن كەمسىتۋشىلىككە كۋا بولعان، 44%-ى قۇربانى بولعان جانە 24%-ى مەكتەپتە باسقا بالالارعا قاتىستى زورلىق-زومبىلىق پەن كەمسىتۋشىلىك ارەكەتتەرىن جاساعان.
پاۆلودار
16 قاراشادا ۇمىتكەر ەسىرتكى تۇتىنۋشىلارى مەن ناشاقورلارعا ارنالعان ورتالىققا باردى. قۇقىق قورعاۋشى قاراپايىم مەكتەپ وقۋشىلارىنىڭ ەسىرتكى «جەتكىزۋشى» بولىپ جۇمىس ىستەيتىنىن ايىپتادى.
ۇمىتكەردىڭ ايتۋىنشا، تاۋەلدىلىكتى جەڭگەن ادامداردىڭ قوعامداستىعىن قۇرۋ ماڭىزدى. اكىمدىكتەر ولارعا جان-جاقتى قولداۋ كورسەتىپ، كومەك بەرۋى كەرەك. قوعامنىڭ بەلسەندى وكىلدەرى قىلمىسكەر مەن ناشاقوردى اجىراتۋ ءۇشىن قۇقىق قورعاۋ ورگاندارىمەن بىرلەسىپ جۇمىس ىستەۋ كەرەك.
پەتروپاۆل
ۇمىتكەر 17 قاراشادا ءسابيت مۇقانوۆ اتىنداعى وبلىستىق امبەباپ عىلىمي كىتاپحاناسىندا بولدى، وندا سىبايلاس جەمقورلىقپەن كۇرەس جانە بيلىكتى دەساكراليزاسيالاۋ قاجەتتىگى تۋرالى ماسەلەلەر كوتەرىلدى. ودان كەيىن يۆان زەنچەنكو اتىنداعى ءسۇت زاۋىتىنىڭ جۇمىسشىلارىمەن اڭگىمەلەسىپ، ايەلدەر اراسىنداعى كاسىپكەرلىكتى دامىتۋ ماسەلەلەرى تالقىلاندى.
ەلىمىزدىڭ 12 وبلىسىن ارالاعان سالتانات تۇرسىنبەكوۆا شتاب ۇجىمىمەن بىرگە 16 مىڭ شاقىرىمنان استام جولدى ءجۇرىپ ءوتتى.