گرانتتار بەرۋدىڭ بارلىق پروسەسى ەلەكتروندىق فورماتقا اۋىستىرىلعان.
وسى جىلعى 1 قازانداعى جاعداي بويىنشا، كاسىپكەرلىكتى دامىتۋ جونىندەگى 2021-2025 جىلدارعا ارنالعان ۇلتتىق جوبا شەڭبەرىندە ءوز ءىسىن اشۋعا 400 اەك-كە دەيىنگى مولشەردەگى گرانتتاردى 12،1 مىڭ ادام الدى، ونىڭ 7،9 مىڭى (65،3%) - اۋىلدىق جەرلەردىڭ تۇرعىندارى، دەپ حابارلادى Almaty-akshamy.kz ەڭبەكمينى باسپا ءسوز قىزمەتىنە سىلتەمە جاساپ.
بيزنەستى اشۋعا مەملەكەتتەن قارجىلىق قولداۋ بولىنگەن ازاماتتار گرانت العان كۇننەن باستاپ ءۇش اي ىشىندە ءوز قىزمەتىن قولدانىستاعى زاڭناماعا سايكەس سالىق ورگاندارىندا تىركەۋگە مىندەتتى. بۇگىنگى تاڭدا كاسىپكەرلىك قىزمەتتى 7 133 ادام تىركەدى.
مەملەكەتتىك گرانت الۋشىلار قاتارىندا جاستار اراسىنان 5 865 ادام، كوپ بالالى وتباسىلاردان 3 580 ادام، 1 061 مۇگەدەكتىگى بار ادام، 760 مۇگەدەكتىگى بار بالا تاربيەلەپ وتىرعان ادام، تابىسى از وتباسىلاردان 453 ادام، 119 ىشكى قونىس اۋدارۋشىلار، 97 اسىراۋشىسىنان ايىرىلۋ جاعدايى بويىنشا الەۋمەتتىك جاردەماقى الۋشىلار جانە 15 قانداس بار.
گرانتتار قاجەتتى قۇرال-جابدىقتار مەن تەحنولوگيالىق جابدىقتاردى ساتىپ الۋعا، جانۋارلاردى وسىرۋگە جانە وسىمدىكتەردى وسىرۋگە، سونداي-اق ءۇي-جايلاردى جالعا الۋعا بەرىلدى.
2022 جىلى حالىقتىڭ الەۋمەتتىك وسال ساناتتارىنا جاتاتىن جاستار مەن ازاماتتار ءۇشىن 20 مىڭ گرانت بەرۋ جوسپارلانۋدا. الەۋەتتى الۋشىلاردى ىرىكتەۋ 5ء-شى لەكتە جۇرگىزىلەتىن بولادى، بۇل رەتتە 4ء-شى لەك شەڭبەرىندە كانديداتتاردان وتىنىمدەردى قابىلداۋ 30 قىركۇيەكتە اياقتالاتىنىن ىستەرىڭىزگە سالا كەتەيىك.
گرانت الۋعا وتىنىشتەردى قابىلداۋ تۋرالى حابارلاندىرۋ ول باستالعانعا دەيىن كۇنتىزبەلىك 10 كۇن بۇرىن ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ، جەرگىلىكتى اتقارۋشى جۇمىسپەن قامتۋ ورگاندارىنىڭ جانە قالالار مەن اۋدانداردىڭ حالىقتى جۇمىسپەن قامتۋ ورتالىقتارىنىڭ ينتەرنەت-رەسۋرستارىندا جاريالانادى.
گرانتتار بەرۋدىڭ بارلىق پروسەسى ەلەكتروندىق فورماتقا اۋىستىرىلدى، مەملەكەتتەن ءوز ءىسىن اشۋعا قارجىلىق قولداۋ الۋعا وتىنىمدەردى قابىلداۋ ءبىرىڭعاي تەرەزە – Business.enbek.kz پورتالى ارقىلى جۇزەگە اسىرىلادى.