ەلدىڭ باسىم بولىگىندە توتەنشە ءورت ءقاۋىپى كۇتىلەدى.
قازگيدرومەت ەل اۋماعىندا 12 ماۋسىمدا بولاتىن ءقاۋىپتى مەتەورولوگيالىق قۇبىلىستارعا بولجام جاسادى، دەپ حابارلايدى Almaty-akshamy.kz.
جوعارى قىسىم اۋماعى ىقپالىنىڭ اسەرىنەن ەلىمىزدىڭ باسىم بولىگىندە جاۋىن-شاشىنسىز اۋا رايى كۇتىلەدى، ەلىمىزدىڭ سولتۇستىگىندە، قيىر شىعىسىندا، وڭتۇستىك-شىعىسىندا جانە وڭتۇستىگىندە فرونتالدى بولىمدەردىڭ وتۋىنە بايلانىستى، نايزاعاي ويناپ، وتكىنشى جاڭبىر جاۋادى، بۇرشاق ءتۇسىپ، داۋىل بولۋى ىقتيمال. رەسپۋبليكا بويىنشا جەلدىڭ كۇشەيۋى ساقتالۋدا، وڭتۇستىكتە، باتىستا، ورتالىقتا شاڭدى داۋىل، سولتۇستىكتە – تۇمان كۇتىلەدى.
«اتىراۋ، اقتوبە وبلىستارىنىڭ باسىم بولىگىندە، ماڭعىستاۋ، قوستاناي وبلىستارىنىڭ وڭتۇستىگىندە قاتتى ىستىق بولادى.
تۇركىستان، اقتوبە، قىزىلوردا، ماڭعىستاۋ، جامبىل، اباي، شىعىس قازاقستان، اقمولا جانە جەتىسۋ وبلىستارىندا، اتىراۋ وبلىسىنىڭ شىعىسىندا، وڭتۇستىگىندە، باتىس قازاقستان وبلىسىنىڭ وڭتۇستىگىندە، قوستاناي وبلىسىنىڭ وڭتۇستىك جارتىسىندا، پاۆلودار وبلىسىنىڭ سولتۇستىگىندە، ۇلىتاۋ وبلىسىنىڭ ورتالىعىندا، قاراعاندى وبلىسىنىڭ وڭتۇستىگىندە، الماتى وبلىسىنىڭ سولتۇستىگىندە جانە ورتالىعىندا توتەنشە ءورت ءقاۋىپى كۇتىلەدى»، - دەپ بولجايدى سينوپتيكتەر.