«الماتى جاستارى» باعدارلاماسىنا قۇجات قابىلداۋ اياقتالدى.
جەڭىلدەتىلگەن يپوتەكالىق نەسيەگە 11 مىڭنان استام ادام ءوتىنىم بەردى، دەپ حابارلايدى Almaty-akshamy.kz
«الماتى جاستارى» سايتىندا وتىنىشتەر مەن قۇجاتتاردى بەرۋ ەلەكتروندىق-سيفرلىق قولتاڭبا ارقىلى جۇزەگە اسىرىلدى. باعدارلاماعا قاتىسۋ ءۇشىن 11 199 ءوتىنىم بەرىلدى. وتىنىشتەردىڭ باسىم بولىگى ءبىلىم، دەنساۋلىق ساقتاۋ، الەۋمەتتىك سالا مەن ىشكى ىستەر ورگاندارىنىڭ قىزمەتكەرلەرىنەن ءتۇستى.
1 ماۋسىم ساعات 23:59-دا ءوتىنىش قابىلداۋ تولىق اياقتالدى. 2 ماۋىسىمنان باستاپ بۇكىل وتىنىشتەر جۇكتەلەدى. بۇدان ءارى 20 جۇمىس كۇنى ىشىندە كەلىپ تۇسكەن وتىنىشتەردىڭ باعدارلاما تالاپتارىنا سايكەستىگى تەكسەرىلىپ، ءار ساناتتا جينالعان بالل سانىمەن ءتىزىم قۇرالادى. اتالعان باعدارلامانىڭ بيۋدجەتى 18 ملرد تەڭگە. بەرىلەتىن قارىزدىڭ ەڭ جوعارعى شەگى - 18 ملن تەڭگەگە دەيىن، پايىزدىق مولشەرى 5%، باستاپقى جارناسى - 10 پايىز. بۇل باعدارلامامەن باستاپقى جانە قايتالاما تۇرعىن ءۇيدى ساتىپ الۋعا بولادى.
بيىل اتالعان باعدارلامامەن 1000 ادامدى قامتۋ جوسپارلانعان. «الماتى جاستارى» باعدارلاماسىنا قۇجات قابىلداۋ 18 مامىردا باستالعان بولاتىن.