ويتكەنى ولار بالالارىنا ساموكات پەن موپەد جۇرگىزۋگە رۇقسات بەرگەن.
الماتى پوليسەيلەرى اۆتوتۇراققا قويىلعان موپەدتەردى كورسەتتى، دەپ حابارلايدى Almaty-akshamy.kz
وتكەن دەمالىس كۇندەرى قالا جولدارىندا 2 مىڭعا جۋىق قۇقىقبۇزۋشىلىق انىقتالدى، ونىڭ باسىم بولىگىن ەلەكتروساموكاتتار مەن موپەدتەردى پايدالانۋشىلار جاساعان.
جالپى ساموكاتتار مەن موپەدتەردى پايدالانۋ بويىنشا قۇقىق بۇزۋشىلىقتاردى انىقتاۋعا قاتىستى جەرگىلىكتى ءىس-شارا باستالعاننان بەرى 4 800 موپەد جۇرگىزۋشىسى جانە 5 200 ساموكات جۇرگىزۋشىسى اكىمشىلىك جاۋاپكەرشىلىككە تارتىلدى. كامەلەتكە تولماعانداردىڭ ەكى دوڭگەلەكتى كولىكتى پايدالانۋىنا ەرەكشە نازار اۋدارىلادى.
"100-گە جۋىق اتا-انا بالالارىنا ساموكات پەن موپەد جۇرگىزۋگە رۇقسات بەرگەنى ءۇشىن جاۋاپكەرشىلىككە تارتىلدى. بۇل جالپى زاڭ مەن قاۋىپسىزدىك ستاندارتتارىنا قايشى كەلەدى"، دەدى الماتى پوليسيا دەپارتامەنتى جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
سپيكەردىڭ ايتۋىنشا، كەڭ اۋقىمدى رەيدتەر ناتيجەسىندە مىڭنان اسا موپەد، سونداي-اق 3 مىڭ 625 اۆتوكولىك مامانداندىرىلعان ايىپپۇل تۇراعىنا ورنالاستىرىلدى.
"ىشكى ىستەر مينيسترلىگى قابىلداعان شارالار ساموكاتتاردى پايدالانۋ جاعدايىن ءبىرشاما تۇراقتاندىرۋعا مۇمكىندىك بەردى: جاس شەكتەۋلەرى بەلگىلەندى، قورعانىس قۇرالدارىن مىندەتتى تۇردە پايدالانۋعا جانە جولاۋشىلاردى تاسىمالداۋعا تالاپتار قويىلدى. الايدا قايعىلى وقيعالار جالعاسۋدا. جىل باسىنان بەرى ساموكاتتار مەن موپەدتەردىڭ قاتىسۋىمەن 463 جول-كولىك وقيعاسى ورىن الىپ، ناتيجەسىندە 500 ادام جاراقات الدى، 7 ادام قازا تاپتى. 68 جاعدايدا ەكى دوڭگەلەكتى كولىكتى بالالار جۇرگىزگەن"، - دەيدى سەرىك شۋمايەۆ.