1 ساۋىردە وتباسى بانككە اۋدارىلعان ءبىرجولعى زەينەتاقى تولەمدەرى ءبىرىڭعاي جيناقتاۋشى زەينەتاقى قورىنا قايتارىلا ما؟ بۇل تۋرالى بانكتىڭ باسپا ءسوز قىزمەتىنەن ءمالىم ەتتى، دەپ حابارلايدى اlmaty-akshamy.kz.
«2022 جىلعى 1 ساۋىردە قازاقستاندىقتاردىڭ وتباسى بانكتەگى ارنايى شوتتارىنداعى ءبىرجولعى زەينەتاقى تولەمى بجزق-عا قايتارىلادى دەگەن قاۋەسەت تارادى. وسىعان بايلانىستى، وتباسى بانكتەگى ازاماتتاردىڭ ارنايى شوتتارىنداعى قاراجات ولاردىڭ مەنشىگى ەكەنىن تۇسىندىرەمىز. ارنايى شوتقا اقشا تۇسكەن ساتتەن باستاپ قازاقستاندىقتاردىڭ تۇرعىن ءۇي جاعدايلارىن جاقسارتۋ ماقساتىندا ولاردى پايدالانۋ بويىنشا راستايتىن قۇجاتتاردى ۇسىنۋ ءۇشىن 20 جۇمىس كۇنى بار. وسىلايشا، ناۋرىزدىڭ اياعىندا ارنايى شوتقا تۇسكەن اقشانى 2022 جىلدىڭ 30 ساۋىرىنە دەيىن قولدانۋعا بولادى. ەگەر قاراجات ەمدەلۋ ماقساتىندا سۇرالىپ، ارنايى شوتقا تۇسكەن بولسا، وندا ازاماتتاردىڭ ولاردى پايدالانۋ ماقساتىن راستاۋ ءۇشىن 45 جۇمىس كۇنى بار»، - دەلىنگەن اتالعان بانك حابارلاماسىندا.
قارجى ينستيتۋتىنىڭ اتاپ وتۋىنشە، ارنايى شوتقا ءوز قاراجاتىن ءتۇسىرىپ قويعان ءوتىنىش بەرۋشىلەر بانكتىڭ ايماقتىق فيليالدارىنا بارماي-اق، قۇجاتتاردى اسىقپاي جيناۋى كەرەك. ويتكەنى بارلىق راسىمدەر ونلاين رەجيمىندە وتەدى.
سونداي-اق الەۋمەتتىك جەلىلەردە سوڭعى ءۇش كۇندە زەينەتاقى جيناقتارىنىڭ ارتىلعان سوماسى جوعالىپ كەتتى دەگەن قاتە مالىمدەمەلەر تارالىپ جاتىر. مىسالى، 2022 جىلعى 25-28 ناۋرىز ارالىعىندا بەرىلگەن 53 649 ءوتىنىمدى، سۇرالعان قاراجاتتىڭ جەتكىلىكسىزدىگىنە بايلانىستى، بجزق كەرى قايتاردى. بۇعان ۆاليۋتا باعامىنىڭ وزگەرۋى جانە وسىعان بايلانىستى زەينەتاقى جيناقتارىن قايتا باعالاۋ اسەر ەتتى. 2022 جىلعى 25 ناۋرىزدا زەينەتاقى اكتيۆتەرىن قايتا باعالاۋعا ىقپال ەتكەن دوللاردىڭ باعامى 494،16 تەڭگەنى، ال 2022 جىلعى 28 ناۋرىزدا 484،49 تەڭگەنى قۇرادى.
ءوزىنىڭ ءبىرجولعى زەينەتاقى تولەمىن بۇرىنعى شەكتى كورسەتكىش بويىنشا پايدالانۋ ءۇشىن وتباسى بانك enpf-otbasy.kz پورتالىندا ءوتىنىم بەرۋدى 2022 جىلدىڭ 29 ناۋرىزىنا دەيىن ۇلگەرۋدى ۇسىندى. سەبەبى، تۇرعىن ءۇي جاعدايلارىن جاقسارتۋعا جانە وتباسىن ەمدەۋگە ارنالعان ءبزت-ىن پايدالانۋ قاعيدالارىنا سايكەس بانك 2 جۇمىس كۇنى ىشىندە ءوتىنىمدى وڭدەپ، بجزق-عا جىبەرەدى. بجزق قولدانىستاعى شەكتى كورسەتكىش بويىنشا وتىنىمدەردى 2022 جىلدىڭ 31 ناۋرىزىن قوسا العاندا ساعات 23:59-عا دەيىن قابىلدايدى جانە قاراستىرادى.
بۇگىن بجزق-عا جولداناتىن ءوتىنىمدى تولىق جاساپ اياقتاماعان 35 مىڭ ءوتىنىش بەرۋشىگە سمس حابارلاما جىبەرىلەدى. ولاردى پورتالعا كىرىپ، ەسق كومەگىمەن ەكى وتىنىشكە قول قويۋدى سۇرايمىز: جەكە تابىس سالىعىن ۇستاپ قالۋ تۋرالى جانە ءبىرجولعى زەينەتاقى تولەمىنە ارنالعان ءوتىنىش.
«وتىنىمدەردىڭ كوپشىلىگى قايتالانادى. بىرنەشە رەت ءوتىنىش بەرگەن رەكوردسمەندەر بار. ءبىراق ءدال وسى ناۋرىز ايىندا ءبىز قالىپتى جاعدايعا جاتپايتىن پروسەستەردى بايقادىق: مىسالى، 5 تەڭگە الۋعا ءوتىنىم بولدى، 40 تەڭگەدەن 2000 تەڭگەگە دەيىنگى سوماعا 161 ءوتىنىم جولداندى. ادامنىڭ كومپيۋتەرلىك ساۋاتتىلىعىنىڭ ورتاشا دەڭگەيىندە پورتالدا بولۋ ۋاقىتى 15-20 مينۋتتى الاتىنىن ەسكەرسەك، مۇنداي وپەراسيالاردىڭ قارجىلىق ءمانى تۇسىنىكسىز. سونداي-اق اقىلعا قونىمسىز سۇرانىستارى بار وتىنىمدەر تۇسە باستادى. مىسالى، پورتالدا 200 ملن تەڭگەدەن 6 ملرد تەڭگەگە دەيىن 627 ءوتىنىم كەلىپ ءتۇستى. ءبىرجولعى زەينەتاقى تولەمدەرىنىڭ مۇنداي سوماسى بۇرىن-سوڭدى بولماعانى تۇسىنىكتى. مامىر ايىنىڭ باسىندا زەينەتاقى جيناقتارىن پايدالانۋ جانە وسى بىرەگەي جوبانىڭ ەرەكشەلىكتەرى تۋرالى حالىققا تولىق ەسەپ جاريالاۋدى جوسپارلاپ وتىرمىز»، - دەپ اتاپ ءوتتى «وتباسى بانك» اق باسقارما ءتوراعاسى ءلاززات يبراگيموۆا.