قالادا اقشا جاساۋشى جالعان قاعازدى وتكىزگەلى تۇرعان جەردەن ۇستالدى
جالعان اقشا جاساۋشى 1 ملن-عا جۋىق جالعان دوللاردى وتكىزبەكشى بولعانى ءۇشىن 6 جىلعا سوتتالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جالعان اقشا جاساۋعا قارسى ءىس-قيمىل - ق ر قارجىلىق مونيتورينگ اگەنتتىگىنىڭ باسىم باعىتتارىنىڭ ءبىرى.
وسىلايشا، اگەنتتىكتىڭ الماتى قالاسى بويىنشا اۋماقتىق دەپارتامەنتى وتكەن جىلدىڭ قىركۇيەك ايىندا جالعان 100 دوللارلىق كۋپيۋرالاردى وتكىزۋ دەرەگىن انىقتادى.
قىزمەتكەرلەر جەدەل باقىلاۋداعى ساتىپ الۋدى جۇرگىزىپ، ونىڭ بارىسىندا قالا تۇرعىنى ت.قالييەۆ 293 مىڭ اقش دوللارىنا جالعان كۋپيۋرالاردى وتكىزۋ ارەكەتى كەزىندە ۇستالدى. تەرگەۋ مالىمەتتەرى بويىنشا، ت.قالييەۆ 2020 جىلدىڭ قىركۇيەگىنەن قاراشاسىنا دەيىن نومينالى 100 اقش دوللارى بولاتىن جالعان شەتەل ۆاليۋتاسىن بىرنەشە رەت وتكىزگەن.
ءتىنتۋ ناتيجەسىندە زاڭسىز اينالىمنان 975 مىڭنان استام جالعان دوللار تاركىلەندى. ت.قالييەۆكە 6 جىلعا باس بوستاندىعىنان ايىرۋ جازاسى تاعايىندالدى.
قۇرمەتتى ازاماتتار! ەگەر ءسىز جالعان بانكنوتتى تاپساڭىز، دەرەۋ اگەنتتىككە + 7 (7172) 708 478 سەنىم تەلەفونى بويىنشا نەمەسە الەۋمەتتىك جەلىلەردەگى رەسمي اككاۋنتتار ارقىلى حابارلاسىڭىز.