ماگيستراتۋراعا ءتۇسۋ ءۇشىن كەشەندى تەستىلەۋگە قاتىسۋعا وتىنىشتەر 1 ماۋسىمنان 8 شىلدەگە دەيىن قابىلدانادى.
تىركەلۋ ۇلتتىق تەستىلەۋ ورتالىعىنىڭ سايتىندا جۇرگىزىلەدى، تەستىلەۋ 20 شىلدە مەن 10 تامىز ارالىعىندا وتەدى، دەپ حابارلايدى Almaty-akshamy.kz.
ۇمىتكەرلەر تەستىلەۋدەن وتكىسى كەلەتىن قالانى وزدەرى تاڭداي الادى. وتىنىشتەردى قابىلداۋ مەرزىمى اياقتالعانعا دەيىن ءبىلىم بەرۋ باعدارلامالارىنىڭ توبى، ءتىلى جانە تەستىلەۋدى تاپسىرۋ ورنى بويىنشا وتىنىشكە وزگەرىستەر ەنگىزۋ مۇمكىندىگى بار.
عىلىمي-پەداگوگيكالىق ماگيستراتۋراعا ءتۇسۋ ءۇشىن كەشەندى تەستىلەۋ ەلەكتروندىق فورماتتا وتەدى جانە ءۇش بولىمنەن تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست. بارلىعىنا 3 ساعات 55 مينۋت بەرىلەدى. شەكتى بالل – 75 بالل.
شىعارماشىلىق ماماندىقتار بويىنشا بەيىندى ماگيستراتۋراعا تۇسۋشىلەردەن قۇجاتتار قابىلداۋدى 1 ماۋسىم مەن 8 شىلدە ارالىعىندا جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارى جۇزەگە اسىرادى.
بيىل بەيىندى ماگيستراتۋراعا ءتۇسۋ ەرەجەلەرىنە وزگەرىستەر ەنگىزىلدى. ەندى بەيىندى ماگيستراتۋراعا تۇسۋگە نيەتتى ۇمىتكەرلەر «وقۋعا دايىندىعىن انىقتاۋعا ارنالعان تەست» بولىمىنەن بوساتىلدى. وسىلايشا، ولار تەك ءبىلىم بەرۋ باعدارلامالارى توبىنىڭ بەيىنى بويىنشا تەست تاپسىرادى. شەكتى بالل كەمىندە 30 بالل، ونىڭ ىشىندە ءاربىر بەيىندى ءپان بويىنشا كەمىندە 7 بال الۋ كەرەك.
«سونداي-اق، باسشى لاۋازىمىندا كەمىندە بەس جىل ءوتىلى بار نەمەسە ءبىلىم بەرۋ باعدارلاماسىنىڭ بەيىنىنە سايكەس ماماندىعى بويىنشا كەمىندە 10 جىل ەڭبەك ءوتىلى بار تۇلعالار بەيىندى ماگيستراتۋراعا اقىلى نەگىزدە اڭگىمەلەسۋ ناتيجەلەرى بويىنشا قابىلدانادى»، - دەدى عىلىم جانە جوعارى ءبىلىم مينيسترلىگى.
كەشەندى تەستىلەۋ ناتيجەلەرىمەن كەلىسپەگەن جاعدايدا تۇسۋشىلەر تەستىلەۋ اياقتالعاننان كەيىن ونلاين اپەللياسياعا بەرە الادى.
ماگيستراتۋراعا تۇسۋشىلەر 13 مىڭعا جۋىق ءبىلىم بەرۋ گرانتىنا ۇمىتكەر بولا الادى.