بۇگىن – تۇڭعىش پرەزيدەنت كۇنى. 2012-2021 جىلدارى مەملەكەتتىك مەرەكە رەتىندە تويلاندى.
ال بىلتىرعى قىركۇيەكتەن بەرى بۇل تىزىمنەن شىعارىلدى. ءماجىلىستىڭ تاراتقان مالىمەتىنە سايكەس، مەملەكەتتىك رامىزدەر كۇنى، العىس ايتۋ كۇنى سياقتى قوعامدىق ماڭىزى جوعارى داتاعا اينالدى. بۇل – پرەزيدەنتتىك ينستيتۋت سالاسىنداعى اۋقىمدى رەفورمانىڭ باستاۋى ەدى. وسىدان 12 جىل بۇرىن سەنات 1 جەلتوقساندى تۇڭعىش پرەزيدەنت كۇنى رەتىندە بەكىتتى. ارينە، بۇل داتانىڭ تاڭدالۋى كەزدەيسوق ەمەس. 1991 جىلدىڭ ءدال وسى كۇنى قازاقستاندا العاش رەت پرەزيدەنت سايلاۋى وتكەن-دى. ءسويتىپ، 9 جىل بويى جوعارى دەڭگەيدە تويلانىپ كەلدى. الايدا، بىلتىر مەملەكەتتىك مەرەكەلەر تىزىمىنەن الىندى. ايتسە دە، ساراپشىلار بۇل كۇننىڭ تاريحي ماڭىزى زور ەكەنىن ايتادى.
«1 جەلتوقسان ءبىزدىڭ تاريحىمىزدا ءبارىبىر قالادى. مەملەكەتتىك دەڭگەيدەگى مەرەكە بولماسا دا، تاريحي وتە ماڭىزدى داتا. جالپى، پرەزيدەنت ينستيتۋتى – قازاقتىڭ تاريحىندا بۇرىننان كەلە جاتقان ينستيتۋت. ەڭ العاشقى پرەزيدەنتتىك ينستيتۋتتى ساياسي جۇيەگە ەنگىزۋ كەرەك دەگەن، 17-جىلعى الاش پارتياسىنىڭ باعدارلاماسى بولاتىن. پرەزيدەنت ينستيتۋتى – قوعامنىڭ بىرەگەيلىگىن ساقتاپ قالاتىن ينستيتۋت رەتىندە ءبىزدىڭ ساياسي جۇيەنىڭ نەگىزگى ينستيتۋتتارىنىڭ بىرىنە اينالدى»، - دەدى ق ر پارلامەنتى ءماجىلىسىنىڭ دەپۋتاتى ەركىن ءابىل.
2019 جىلى ەلىمىزدە ساياسي جاڭعىرۋ باستالدى. ال بىلتىر كوكتەمدە پرەزيدەنت ينستيتۋتىنىڭ رەفورماسى تۇبەگەيلى قولعا الىندى. قازاقستان سۋپەرپرەزيدەنتتىك جۇيەدەن باس تارتتى.
«مەن بۇعان دەيىن ايتقانىمداي، قازاقستاندا سۋپەرپرەزيدەنتتىك باسقارۋ ۇلگىسى قالىپتاستى. دامۋدىڭ باستاپقى كەزەڭىندە مەملەكەتىمىزگە مۇنداي ۇلگى قاجەت بولدى. ءبىراق، ءبىز ءبىر ورىندا تۇرعان جوقپىز. قوعام دا، ەلىمىز دە وزگەرۋدە. ساياسي جۇيەمىز جاڭا جاعدايلارعا بەيىمدەلۋگە ءتيىس. ءقازىر بىزدە بارلىعى پرەزيدەنتكە كەلىپ تىرەلەدى. بۇل – دۇرىس ەمەس»، - دەيدى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ.
پرەزيدەنت اMANAT پارتياسىنىڭ ءتوراعالىعىنان كەتىپ، كەيىن پارتيادان شىقتى. وسىلايشا، وزگە دە پارتيالاردىڭ باسەكەلەستىگىنە جاعداي جاسادى. تاعى ءبىر وزگەرىس – مەملەكەت باسشىسىنىڭ بۇرىنعىداي اۋدان-قالا اكىمدەرىن قىزمەتىنەن بوساتۋىنا قۇقى جوق. وسىعان ۇقساس بىرنەشە نورما جويىلدى. بۇل رەفورما پرەزيدەنتتىڭ قولىن بوساتىپ، بار كۇش-جىگەرىن ستراتەگيالىق دامۋعا ارناۋعا مۇمكىندىك بەردى.
«پرەزيدەنت ءوزىنىڭ يناۋگۋراسياسىنان كەيىن، مىسالى 19 ەلگە ءىسساپارىن جاسادى، حالىقارالىق ءىسساپارلارىن. بۇل نە دەگەن ءسوز؟ پرەزيدەنتتىڭ باستى، ۇلكەن نازارى حالىقارالىق ساياساتتاعى، سىرتقى ساياساتتاعى ماسەلەلەرگە ارنالعان. ياعني، بۇگىنگى ينۆەستيسيا ماسەلەسى، ودان باسقا قازاقستاننىڭ باسقا مەملەكەتتەرمەن قارىم-قاتىناسى دەگەن ماسەلەلەردىڭ بارلىعىنا ءوزىنىڭ جۇمىسىن، بۇكىلىن سوعان ارناپ وتىر»، - قسزي ديرەكتورىنىڭ ورىنباسارى الۋا جولدىبالينا.
مەملەكەت باسشىسىنىڭ جاقىن تۋىستارىنا ساياسي مەملەكەتتىك قىزمەتشى بولۋعا جانە كۆازيمەملەكەتتىك سەكتوردا باسشىلىق لاۋازىمداردى يەلەنۋگە زاڭ جۇزىندە تىيىم سالىندى. ياعني، ات توبەلىندەي توپتىڭ ەمەس، حالىقتىڭ مۇددەسى الدىڭعى ورىندا تۇرۋى ءتيىس. بۇگىندە ەلىمىزدە تابىستى تۇردە ءجۇرىپ جاتقان پرەزيدەنتتىك ينستيتۋت سالاسىنداعى رەفورمانىڭ دا كوزدەگەنى وسى.