ۇلتتىق بانك ءتوراعاسى تيمۋر سۇلەيمەنوۆتىڭ مالىمدەۋىنشە، قازاقستاندا ەندى ەكى نومينالداعى مونەتالار شىعارىلمايدى، دەپ حابارلايدى aqshamnews.kz
ۇلتتىق بانك باسشىسى بۇل شەشىم مۇنداي ۇساق نومينالدى مونەتالاردى شىعارۋ شىعىندارىنىڭ ورىنسىزدىعىنا بايلانىستى قابىلدانعانىن ءتۇسىندىردى.
"ءبىز ونى (1 تەڭگەنى – ەسك.) باسىپ شىعارۋدىڭ ورىنسىز ەكەنىنە كەلىسەمىز، سوندىقتان بازالىق جوسپارىمىز مىناداي: اينالىمدا بار مونەتا اينالىمدا قالا بەرەدى، ءبىراق جاڭاسىن شىعارۋ جوسپاردا جوق. 2 تەڭگەلىككە دە قاتىستى وسىلاي"، – دەدى سۇلەيمەنوۆ سەنات كۋلۋارىندا.
ول اينالىمدا جۇرگەن مونەتالاردىڭ اينالىمنان الىنبايتىنىن، ءبىراق جاڭالارىن شىعارۋعا قاراجات بولىنبەيتىنىن اتاپ ءوتتى.
"اينالىمدا جۇرگەن – قالتادا، باسقا جەردە جۇرگەن مونەتالار – تۇسىنىكتى، ولاردى اينالىمنان المايمىز. ءبىراق جاڭاسىن جاساۋعا اقشا جۇمسامايمىز"، – دەپ قورىتىندىلادى ۇلتتىق بانك باسشىسى.