Áleýmettik mańyzdy kórsetkishterdiń mólsheri artty.
30 qarasha kúni zeınetaqy jınaqtarynyń 2023 jylǵa belgilengen eń tómengi jetkiliktilik shegi jarıalandy, dep habarlaıdy Almaty-akshamy.kz Inbusiness.kz saıtyna silteme jasap.
Jetkiliktilik shegi jas erekshelikterine qaraı 3 mln-nan 10 mln teńgege deıingi somany quraıdy. Mysaly, 20 jastaǵylar úshin eń tómengi jetkiliktilik shegi 3 140 000 teńgeden 3 260 000 teńgege deıin, 30 jastaǵylar úshin – 4 370 000 teńgeden 4 580 000 teńgege deıin, 40 jastaǵylar úshin – 5 790 000 teńgeden 6 100 000 teńgege deıin ulǵaıdy.
2022 jylǵy 1 jeltoqsandaǵy jaǵdaı boıynsha, BJZQ salymshylardyń (alýshylardyń) turǵyn úı jaǵdaılaryn jaqsartý úshin zeınetaqy jınaqtaryn paıdalaný týraly 1 340 016 ótinishin oryndady. Bankterde ashylǵan qazaqstandyqtardyń arnaıy shottaryna – ýákiletti operatorǵa BJZQ shamamen 3,2 trln teńge qarajat aýdardy. Aıta ketý kerek, salymshylardyń jeke zeınetaqy shottaryna 458 mlrd teńgeden astam qarajat qaıtaryldy. Óıtkeni birjolǵy zeınetaqy tólemderin qazaqstandyqtar zańnamada belgilengen merzimde ne ótinish berýshiniń ótinishi boıynsha jáne ózge de sebepter boıynsha paıdalanbaǵan. Budan bólek BJZQ jalpy somasy 314,9 mlrd teńgege emdelýge berilgen 398 875 ótinishti oryndady. BJZQ-ǵa 32,1 mlrd teńge qarjy qaıtaryldy.
Eń tómengi jetkiliktilik shegin esepteý ádistemesi Úkimettiń qaýlysymen bekitilgen. Oǵan sáıkes, eń tómengi jetkiliktilik sheginiń mólsheri ár jas úshin jyl saıyn qaıta qaralyp, bolashaq zeınetaqy tólemderi men zeınetaqy jarnalarynyń ósýi eskeriledi.
Osy tusta eń tómengi jalaqy, zeınetaqynyń eń tómengi mólsheri, eń tómengi kúnkóris deńgeıi sekildi áleýmettik kórsetkishter qoldanylady. 2023 jyly eń tómengi jalaqy 70 000 teńge, zeınetaqynyń eń tómengi mólsheri – 53 076 teńge, memlekettik bazalyq zeınetaqy tóleminiń eń tómengi mólsheri – 24 341 teńge, eń tómengi kúnkóris deńgeıi 40 567 teńge bolyp belgilendi. Eń tómengi jetkiliktilik shegin esepteý kezinde eskeriletin basqa da áleýmettik mańyzdy kórsetkishterdiń mólsheri artty.