Ol 3 myń shaqyrymdy 34 kúnde júrip ótken.
El Táýelsizdiginiń 30 jyldyǵyna oraı «Táýelsizdik urpaqtary» jalpyulttyq jobasy aıasynda Jetisý óńiriniń týmasy Almat Baltabekovtiń Nur-Sultan qalasynan Taldyqorǵan qalasyna deıingi velo-sapary aıaqtaldy.
Sportshyny týystary, jerlesteri, sporttaǵy áriptesteri qýanyshpen qarsy aldy.
Almat Baltabekov Nur-Sultan qalasynan bastap, Qorǵaljyn, Ulytaý, Qyzylorda, Túrkistan, Shymkent, Jetisaı, Taraz, Almaty, Taldyqorǵan qalalary men eldi mekenderi arqyly 3000 shaqyrymdy 34 kúnde júrip ótken.
Almat Baltabekovtiń aıtýynsha, ol buryn jol tosyp saıahattaýmen áýestengen. Keıin ishki týrızmdi damytýǵa jáne sportty nasıhattaýǵa baǵyttalǵan osyndaı patrıottyq velotýrǵa shyǵý týraly oı kelgen.
«Elimizdiń óńirlerin aralaǵan kezde jergilikti turǵyndarmen aralasýǵa, tabıǵat tamashalaryn kórip úlgerýge tyrystym. El táýelsizdiginiń otyz jylyndaǵy jetistikterine kýá boldym. Alǵan áserimmen «Instagram» paraqshasynda bólisip otyrdym. Meni halqymyzdyń qonaqjaılyǵy tánti etti. Qaı jerge barsam da, beıtanys adamdar meni qurmetti qonaǵyndaı qarsy aldy», - dedi A.Baltabekov.
Astanalyq jastardyń atynan Almaty oblysynyń jastar saıasaty máseleleri jónindegi basqarmanyń jastaryna sımvolıkalyq statýetkany syıǵa tartyp, kórsetken qoldaýy úshin basqarmaǵa rızashylyǵyn jetkizdi.
Oblystyq jastar saıasaty máseleleri basqarmasynyń málimetinshe, sapardyń negizgi maqsaty - salaýatty ómir saltyn nasıhattaý, ishki týrızm men sportty damytý. Qazaqstan Respýblıkasy Táýelsizdiginiń 30 jyldyǵyn merekeleý qarsańynda osyndaı patrıottyq aksıalardy qoldaý urpaq tárbıesine qosylǵan súbeli úles bolmaq.
Atap ótsek, Almat Baltabekov İ.Jansúgirov atyndaǵy Jetisý ýnıversıtetin «Psıhologıa» mamandyǵy boıynsha aıaqtaǵan. Taldyqorǵan qalasyndaǵy Jastarǵa qyzmet kórsetý ortalyǵynda stýdenttik tájirıbeden ótken. Qazir Nur-Sultan qalasyndaǵy Psıhıkalyq densaýlyq ortalyǵynda jumys isteıdi.