11 jastan 15 jasqa deıingi elektrondy temeki shegetin jasóspirimderdiń sany 3 esege kóbeıgen.
Qazaqstanda bir rettik elektrondy temekimen kúres máselesi qolǵa alyndy. Bul týraly QR Ulttyq ekonomıka mınıstri Áset Erǵalıev málim etti, dep habarlaıdy Almaty-akshamy.kz
«Bir rettik elektrondy temekimen kúres máselesin Densaýlyq saqtaý mınıstrligimen birge qarastyryp jatyrmyz. Ázirge qashan jáne qalaı bolatyny týraly aıta almaımyn. Bul jerde mamandardan bólek, kásipkerlerdiń de pikirin eskerý qajet. Barlyq jaqtyń ustanymyn bilý úshin ýaqyt kerek. Sonymen qatar bul máselege qatysty arnaıy jumys toby jáne depýtattarmen birlesken jumys júrip jatyr», - dedi Áset Erǵalıev.
Budan buryn depýtat Mádı Ahmetov Májilistiń jalpy otyrysynda bir rettik elektrondy temekiniń jastar arasynda keńinen taralýyna alańdaýshylyq tanytqan edi.
«Dúken bylaı tursyn, áleýmettik jelini ashsańyz, nıkotındi taýardy táýlik boıy úıińizge tegin jetkizip beretin pablıkterde, anonımdi telegram kanaldarda júzdegen jarnama bar. Tapsyrys berýshiniń jasyn surap, bas qatyryp jatqan eshkim joq. Osynyń saldarynan oqý jylynyń basynan oqýshylar arasynda tútini býdaqtaǵan zıandy shylymǵa suranys eselep artqan. Tipti, keıbir mektepterde joǵary synyp oqýshylary bastaýysh synyptarǵa bir rettik temekiniń qunyna aqsha qosyp satyp, áýestendirip júr. Elimizdiń ulttyq qoǵamdyq densaýlyq saqtaý ortalyǵynyń sońǵy 2019 jylǵy zertteýleriniń málimetine súıensek, 11 jastan 15 jasqa deıingi elektrondy temeki shegetin jasóspirimderdiń sany 3 esege, al qyzdar arasynda 2 esege ósken. Kósh basynda 3,9 paıyz kórsetkishpen almatylyq jasóspirimder tur. Atalǵan zertteý sońǵy eki jyl júrgizilmegendikten, qazirgi jaǵdaı múlde belgisiz», - dedi Mádı Ahmetov.