Qanysh Sátbaev kóshesiniń jalpy uzyndyǵy 7 shaqyrym. Sonyń jartysy, ıaǵnı ortalyǵy kúrdeli jóndeýden ótedi.
Lýganskıı-Baızaqov kósheleriniń aralyǵyna jaıaý júrginshiler jolaǵy, serýendeıtin alańdar, qoǵamdyq keńistikter salynady, dep habarlaıdy Almaty-akshamy.kz
Almaty qalalyq Josparlaý jáne ýrbanıstıka basqarmasynyń basshysy Almasqan Ahmetjanovtyń aıtýynsha, megopolıstiń ortalyq kóshesindegi tarıhı jáne mádenı nysandardy baılanystyratyn jaıaý júrginshiler joly salynady.
«Búgingi kúni qalada jalpy uzyndyǵy 54 shaqyrym bolatyn 110 jaıaý júrginshi aımaǵy bar. Qala aldaǵy ýaqytta megapolıstiń áleýetin tıimdi paıdalana otyryp, qalanyń ortalyq bóliginde de, shetki aýdandarynda da jańa qoǵamdyq keńistikter qurýdy josparlap otyr», - dedi Almasqan Ahmetjanov.
Spıker uzyndyǵy 380 metr bolatyn Músirepov kóshesi Abaı dańǵylynan Sátbaev kóshesine deıin qalaı ózgeretinin mysalǵa keltirdi. Tujyrymdama boıynsha joba eki taqyryptyq bólimge bólingen. Birinshisi – «Vremena goda» býlvary – Abaı dańǵylynan Sátbaev kóshesine deıin. Ekinshisi – Músirepov kóshesiniń boıymen Sátbaev kóshesinen Tımırázev kóshesine deıin turǵyn úılerdiń boıymen ótetin jáne Botanıkalyq baq pen QazUÝ arasyn jalǵaıtyn jaıaý júrginshiler býlvary. Sonymen qatar, ol Respýblıka alańy týraly aıtty.
«Qazirgi tańda Respýblıka alańy avtoturaq retinde paıdalanylady, onyń janynda saýda oıyn-saýyq ortalyǵy, qoǵamdyq oryn bar. Biraq nege adamdar ol jaqqa barmaıdy? Óıtkeni ınfraqurylym joq. Sondyqtan bul jerdi jobaǵa engizdik, munyń bári qalaı bolatynyn aldaǵy ýaqytta kóremiz. Turaqqa keletin bolsaq, biz ony qaldyramyz, biraq onyń aýmaǵy az bolady. Biz jobany kelesi jylǵa josparlap otyrmyz. Bul bizdiń strategıamyz», - dedi basqarma basshysy.
Qanysh Sátbaev kóshesiniń jalpy uzyndyǵy 7 shaqyrym. Sonyń jartysy, ıaǵnı ortalyǵy kúrdeli jóndeýden ótedi. Lýganskıı-Baızaqov kósheleriniń aralyǵyna jaıaý júrginshiler jolaǵy, serýendeıtin alańdar, qoǵamdyq keńistikter salynady. Almaty qalalyq Jasyl ekonomıka basqarmasynyń basshysy Natalá Lıvınskaıanyń aıtýynsha, kósheniń keı bóligi alty jolaqty keń bolsa, endi bir bóligi kólik keptelisi paıda bolatyn tar jol. Sondyqtan qala bıligi osy máseleni de qarastyrady.
«Trotýarlar keńeıtilip, jasyl jelek egiledi, keń kóshelerdi taryltýymyz múmkin. Bul jaıaý turǵyndardyń qaýpsizdigi úshin kerek. Seıfýllın men Baızaqov kósheleri arhıtektýralyq jaǵynan ózgeredi. Keptelisti azaıtatyn nusqany da qarastyryp jatyrmyz»,- deıdi Natalá Lıvınskaıa.