Reanımasıaǵa túsip, qaıtys bolǵan pasıentterdiń basym bóligi der kezinde dárigerge habar bermeı, ózin-ózi emdeýmen aınalysqan.
30 jyldyq tájirıbesi bar ınfeksıonıst dáriger, Nur-Sultan qalasynyń kópsalaly medısınalyq ortalyǵy dırektorynyń orynbasary Sáýle Atyǵaeva osylaı deıdi, dep habarlaıdy Almaty-akshamy.kz Soronavirus2020.kz saıtyna silteme jasap.
Dáriger ózin-ózi emdeýdiń qandaı jaǵdaıǵa jetkizetinin, reanımasıaǵa qandaı naýqas túsetinin, KVI-men aýyrǵanda aldymen ne isteý kerektigin jáne vaksınanyń mańyzyn tilge tıek etti . Onyń aıtýynsha, ózin-ózi emdeýmen birneshe kún aınalysqan aýyr naýqastar ınfeksıalyq stasıonarlarǵa jatqyzylady.
«Internettegi aqparattar negizinde bıologıalyq qospalardy, shópterdi, ımmýnostımýlátorlardy paıdalanyp emdeletinder bar. Olar antıkoagýlánttardy birden qabyldap jatady. Ony paıdaly jáne ımýndyq júıeni nyǵaıtady dep sanaıdy. Degenmen bul úıde emdelýdiń eń tıimsiz jáne eń saýatsyz tásili. Mamandandyrylǵan medısınalyq kómekke júginbeýi arqyly óz densaýlyǵyna zıan keltiredi. Koronavırýstyń óte qaýipti ekenin túsinýimiz kerek. Al mýtasıalanǵan «delta» shtamy tipten juqpaly. Iaǵnı, óziń ǵana emes, jaqyndaryńnyń da reanımasıaǵa túsýine sebep bolýyń múmkin», - deıdi Sáýle Atyǵaeva.
Dáriger naýqastar ábden aýrý dendep ketken kezde ǵana medısınalyq kómekke júginetinin atap ótti.
«Joǵary temperatýra, entigý, dem ala almaý sekildi belgileri shyqqanda ǵana dárigerlerge habar beredi. Ókinishtisi, altyn ýaqytyn ózin-ózi emdeımin dep joǵaltady. Qansha degenmen stasıonarlyq emdeý men reanımasıaǵa jetkizbeıtin ýaqyty boldy emes pe?!» - deıdi ol.
Mamannyń aıtýynsha, naýqastardyń basym bóligi aýyr jaǵdaıda kelip, tynys alý apparatyn qoldanady.
«Ókinishke qaraı, ózin-ózi emdeýden keıin bári birdeı aman qala bermeıdi. Biz ýaqyt joǵaltamyz, saldarynan naýqastardy aman alyp qalý múmkin bolmaı jatady. Reanımasıaǵa túsip, qaıtys bolǵan pasıentterdiń basym bóligi der kezinde dárigerge habar bermeı, ózin-ózi emdeýmen aınalysqan. Al aıryqsha aıta keterligi, bul naýqastar vaksına almaǵan! Vaksınany tolyǵymen alyp, reanımasıa tóseginde jatqan birde-bir naýqas bolǵan joq. Sebebi biz biletindeı, vaksınasıa koronavırýstyń aýyr túrinen qorǵaıdy. Al reanımasıada jatqan naýqastar ýaqytynda vaksına almaǵanyna ókinip jatady», - deıdi Sáýle Atyǵaeva.