Energetıka jáne qarjy salasynda tájirıbesi bar Ulybrıtanıa azamaty Sertach Iener Neo Nomad vızasyn alǵashqylardyń biri bolyp aldy. Ol Qazaqstannyń mádenıeti, tabıǵaty jáne taǵamdarymen jaqynyraq tanysýdy josparlap otyr, dep habarlaıdy aqshamnews.kz.
Sertach Ienerdiń qyzy Chıkago ýnıversıtetinde «Qazaq tili jáne Ortalyq Azıa zertteýleri» mamandyǵy boıynsha bilim alǵan. Sondyqtan ol qazaq tilin burynnan jaqsy biledi. Neo Nomad Visa vızasy alǵash ret Qazaqstannyń BAÁ elshiliginde berildi. Vızany alǵan Sertach Iener jýyrda Qazaqstanǵa kelýdi josparlap otyr. Ol burynnan Qazaqstannyń tabıǵaty, dástúri, mýzykasy jáne asqanasymen tanysýdy armandaǵan.
«Qazaqstan – keremet el! Neo Nomad vızasy bizge Qazaqstanda bir jylǵa deıin bolýǵa múmkindik beredi. Bul vıza meniń sheteldegi jumysymdy qashyqtan jalǵastyryp, Qazaqstandy tereńirek tanyp-bilýge jol ashady», – dedi ol.
Sertach Iener – energetıka salasynyń mamany. Qazirgi tańda ol AQSH-ta taza energıa jobasyn ázirleýmen aınalysady. Aıta keteıik, Neo Nomad vıza baǵdarlamasy Memleket basshysynyń tapsyrmasy boıynsha Týrızm jáne sport, Syrtqy ister, Sıfrlyq damý, İshki ister mınıstrlikteriniń jáne Kazakh Tourism ulttyq kompanıasynyń qatysýymen engizildi. Bul vıza sheteldik týrıserge mobıldi bolýǵa, ózderiniń sheteldegi kompanıalarynda qashyqtan jumys isteýge jáne Qazaqstanda bir jylǵa deıin turýǵa múmkindik beredi. Jańa V12-1 vızasyn alý úshin sheteldegi Qazaqstan elshiligine nemese konsýldyq mekemelerine júginý qajet.