Qazaqstan Ulttyq sport qaýymdastyǵynyń basshylyq quramynda ózgerister boldy. Alty ulttyq sport túri boıynsha respýblıkalyq federasıalardyń basshylary saılandy, dep habarlaıdy Almaty-akshamy.kz.
Respýblıkalyq «Báıge federasıasy» RQB prezıdenti bolyp Kusto Group PTE Ltd. dırektorlar keńesiniń múshesi, YPO Kazakhstan múshesi Qanat Kópbaev saılandy.
«Kókpar» federasıasynyń prezıdenti bolyp Qazaqstannyń qurmetti qurylysshysy, BI Group kompanıasy dırektorlar keńesiniń múshesi Baýyrjan Isabaev saılandy.
«Jamby atý federasıasy» RQB basshysy bolyp Alageum Electric AQ dırektorlar keńesiniń tóraǵasy, «Qazaqstannyń elektr mashınalaryn jasaý qaýymdastyǵy» ZTB basqarma basshysy, YPO Kazakhstan múshesi Erkebulan Ilásov saılandy.
«Aýdaryspaq» federasıasynyń basshysy bolyp Atasu Group kompanıalar tobynyń negizin qalaýshysy men prezıdenti, Qazaqstannyń Eýropalyq bıznes qaýymdastyǵy men YPO Kazakhstan múshesi Marat Juman saılandy.
«Sadaq atý» federasıasynyń prezıdenti bolyp Eurasia Copper dırektorlar keńesiniń tóraǵasy, YPO Kazakhstan múshesi Aıdos Muqataev saılandy.
«Teńge ilý» ulttyq sport túriniń federasıasy» RQB prezıdenti bolyp AlemAgroHolding JSHS teń negizin qalaýshysy Amangeldi Ábdiqadyrov saılandy.
Esterińizge sala ketsek, Ulttyq sport qaýymdastyǵy quramyna «Teńge ilý», «Báıge», «Jamby atý», «Aýdaryspaq», «Kókpar», «Toǵyzqumalaq», «Qusbegilik» jáne «Asyq atý», "Sadaq atý" sıaqty toǵyz ulttyq sport túrinen respýblıkalyq federasıalar kiredi.
Ulttyq sport qaýymdastyǵynyń prezıdenti – kásipker, belgili mesenat Islambek Saljanov.