Úsh mezgil júretin jalǵyz avtobýs bir barǵanda úsh mektepten oqýshy jınaıdy.
Almaty oblysynda bútin bir shaǵynaýdannyń oqýshylary mektepke bara almaı otyr, dep habarlaıdy Almaty-akshamy.kz Almaty.tv-ge silteme jasap.
Aýyl arasyn jalǵaıtyn jalǵyz avtobýstyń jyry jergilikti jurtqa jaýyr bolǵaly jyldar bolǵan. Eki myńǵa jýyq halqy bolsa da, eldiń qyzmetine jaraıtyn qoǵamdyq kólik máselesi áli sheshilmegen. Al ákimdikten berilgen jalǵyz avtobýs bir kún júrse, eki kúni toqtap turady.
«Balalarym mektepke barǵaly 5 jyl boldy. Tórteýi barady sabaqqa. Tańerteń saǵat 6:00-de balany oıatamyz. Saǵat 7:00-de avtobýs kelýi kerek. Al keı kúni ol avtobýs kelmeıdi. Taksı shaqyramyz. Aınaldyrǵan 3-4 taksı bar ákesiniń qunyn suraıtyn», – dedi Arman aýylynyń turǵyny Anara Atabekova.
«Kirseń, shyǵa almaısyń, shyqsań, kire almaısyń. Keshe bir kúnge taksıge 5 myń tóledik. Úsh qyzym úsh ýaqytta oqıdy. Qazir qyzym shyqty. Endi 1,5 saǵat avtobýs kútýi kerek», – dedi Arman aýylynyń turǵyny Baljan Dosmyrzaeva.
Avtobýs arman bolǵan "armandyqtar" osydan bir aı buryn ǵana bes balany kólik qaǵyp, bir balanyń kóz jumǵanyn aıtyp otyr. Ol kezde de aýylǵa qatynaıtyn jalǵyz avtobýstyń aqyly jolmen júrgendegi bereshegi úshin, shlagbaým ashylmaı qalǵan. Sol sátte qoǵamdyq kólikten túsip joldy kesip ótpek bolǵan balalardy mashına qaqqan.
Tehnıkamyzdy tyńǵylyqty etip, avtobýs bersin degen aýyl azamattary İle aýdandyq ákimdigine bardy. Jergilikti bılik bul máseleden habardar.
«Negizgi qoǵamdyq kólik máselesi sheshilse eken. Avtobýs sheship berińizder. Eki apta oqýshylarymyz sabaqqa barmady. Kesheli beri kisiler shýyldap jatqan soń, avtobýsymyz júrip qaldy», – dedi Arman aýylynyń turǵyny Gúlnar Saqova.
«Ótegen batyr men "Arman" shaǵynaýdany arasynda jol salyp bastadyq. Qys bolyp ketti de kelesi jylǵa qaldy. Jol bitse, marshrýt beriledi. Maǵan jetken málimet boıynsha, 10 kún kóleminde avtobýs júrmepti», – dedi Energetıcheskıı aýyldyq okrýginiń ákimi Qanat Rahımov.
Okrýg ákimi avtobýsty búgin júrgizdik degenimen, úsh mezgil júretin jalǵyz avtobýs bir barǵanda úsh mektepten oqýshy jınaıdy.
«Bala sany kóp. Tańerteń syımaı qalady, bári shyqqan kezde. Avtobýs buzylyp, jóndedik», – dedi avtobýs júrgizýshisi Baqbergen Toqmambetov.
«Janarmaıy qatyp, júrýge jaramsyz boldy» degen qoǵamdyq kólik búgin júre bastapty. Al jergilikti bılik ókilderi avtobýs sanyn kóbeıtýge baryn salyp jatqanyn jetkizdi.