Almaty qalasynda Mádenıet jáne sport mınıstri Dáýren Abaev Ulttyq memlekettik mýzeı qyzmetkerlerine gramotalar men alǵys hattar tabys etti.
Ol mýzeı qyzmetkerlerine óz isine adaldyǵy, batyldyǵy jáne óz ómirin qaterge tigip, ulttyq mádenı jáne rýhanı jádigerlerdi qorǵaǵany úshin alǵysyn aıtty, dep habarlaıdy Almaty-akshamy.kz Elorda.info-ǵa silteme jasap.
Sondaı-aq, mınıstr Almatydaǵy jappaı tártipsizdik kezinde mýzeıdi panalaǵan polıseıler men kýrsanttardyń ómirlerin saqtap qalǵany úshin erekshe rızashylyǵyn bildirdi.
«Sizdi búkil el maqtan tutady! Siz keremet batyldyq pen tabandylyqtyń ozyq úlgisin kórsete bildińiz», – dedi D. Abaev.
El basyna kún týǵan, qıyn-qystaý kúnderi mýzeıdi basqarǵan jáne búlikshilermen kelissóz júrgizýshi qyzmetin atqarǵan mýzeı dırektorynyń orynbasary Bıbigúl Dandyǵaraeva óziniń azamattyq jáne kásibı boryshyn atqarǵanyn aıtty.
«Bul ákimdik emes, bul mýzeı, biz halqymyzdyń mádenı murasyn saqtap otyrǵan kıeli oryn. Qoldaryna lom, taıaq ustap kirip kelgen jas jigitterge jalyndym. Eger olar ulttyq jádigerlerimizdi qıratyp, órtep jiberetin bolsa, onda óz tarıhymyzdan aıyrylamyz. Osy nárse kókeıimnen ketpedi. Qazir bári tynyshtaldy. Maǵan ataq ta, baılyq ta, marapat ta kerek emes. Eń bastysy, mýzeıimiz aman bolsyn!» - dedi ol.