Maýsymnyń aıynda teńge baǵamy 13,3 paıyzǵa álsiredi.
Ulttyq bank tóraǵasynyń orynbasary Álıa Moldabekova teńge baǵamyna áser etetin negizgi faktorlar men valúta naryǵyndaǵy jaǵdaı týraly aıtty, dep habarlaıdy QazAqparatqa silteme jasap.
Ulttyq bank ókiliniń sózinshe, maýsymnyń qorytyndysy boıynsha teńge baǵamy bir dollar úshin 470,24 teńgege deıin nemese 13,3 paıyzǵa álsiredi. Naryqtaǵy mundaı ózgeristerge syrtqy faktorlarmen qatar ishki faktorlar da sebepshi boldy.
«Birinshi kezekte, AQSH dollary pozısıasynyń kúsheıgenin atap ótken jón. İshki faktorlar arasynda – dıvıdendter tóleý kezeńinde zańdy tulǵalar tarapynan valútaǵa suranystyń artýy jáne eksporttaýshylardyń salyqty tóleýge satýdyń qysqarýyna baılanysty valúta usynysynyń tómendeýi. Kvazımemlekettik sektor kompanıalarynyń shamamen 480,4 mıllıon AQSH dollaryn quraǵan valútalyq túsimin satýy jáne Ulttyq qordan respýblıkalyq búdjetke transfertterdi qamtamasyz etý úshin valútany satý usynys jaǵynan valúta naryǵyna qoldaý kórsetti», - dedi Álıa Moldabekova.
Sonymen qatar, ol maýsym aıynda Ulttyq bank ishki valúta naryǵynda valútalyq ıntervensıalar júrgizbegenin jetkizdi. Naryq sentımenti men qubylmaly bolýy naryq jaǵdaıyna sáıkes kelgen.
«Aıyrbastaý baǵamynyń ózgermeli rejıminde teńge úshin qubylmalylyqtyń bolýy qalypty jaǵdaı ekenin atap ótkim keledi», - dedi Ulttyq bank tóraǵasynyń orynbasary Álıa Moldabekova.
Mamanyń aıtýynsha, tirkelgen baǵam saıasaty qysqa merzimdi turaqtylyq elesin qalyptastyrady. Ony uzaq ýaqyt boıy jasandy jolmen ustap turý altynvalúta rezervterin jumsaý esebinen ǵana múmkin.
«Nátıjesinde bul ulttyq valúta baǵamyn devalvasıalaý qajettiligine alyp keledi. Óz kezeginde, teńgeniń erkin ózgermeli baǵamy syrtqy ortanyń ózgeristerine birden den qoıýǵa múmkindik beredi. Bul ekonomıkadaǵy teńgerimsizdikterdiń jınaqtalýyn boldyrmaıdy, sondaı-aq eldiń altynvalúta rezervteriniń saqtalýyna yqpal etedi. Sondyqtan Ulttyq Bank tirkelgen baǵamǵa kóshý máselesin qarastyrmaıdy»,- dedi ol.