Bul 2022 jylǵy 1 qyrkúıekke deıin ákelingen kólikterge qatysty.
Úkimet sheteldik avtokólikterdi zańdastyrý erejesin bekitti, dep habarlaıdy Almaty-akshamy.kz İshki ister mınıstrliginiń saıtyna silteme jasap.
11 qańtarda QR №13 «Qazaqstan Respýblıkasynyń aýmaǵyna 2022 jylǵy 1 qyrkúıekke deıin ákelingen kólik quraldarynyń jekelegen sanattaryn bastapqy tirkegeni úshin alym mólsherlemesin qoldaný qaǵıdalaryn, sharttary men merzimderin bekitý jáne osyndaı kólik quraldaryn ákelýdi júzege asyrǵan jeke tulǵalardy óndirýshilerdiń (ımporttaýshylardyń), sondaı-aq kólik quraldary sanattarynyń keńeıtilgen mindettemelerinen bosatý týraly» qaýlyǵa qol qoıyldy.
Qaýly negizinde 2022 jylǵy 1 qyrkúıekke deıin el aýmaǵyna ákelingen kólik quraldarynyń jekelegen sanattaryn bastapqy tirkegeni úshin alym mólsherlemesin qoldanýdyń jáne osyndaı kólik quraldaryn ákelýdi júzege asyrǵan jeke tulǵalardy ýtıl alym tóleýden bosatýdyń tártibi, sharttary men merzimderi aıqyndalady.
Eger kólik quraldary:
1.Qazaqstan Respýblıkasynyń aýmaǵyna 2022 jylǵy 1 qyrkúıekke deıin ákelingen;
2. İzdeýde joq;
3. Basqa memlekettiń quzyretti organynda burynǵy tirkelgen jeri boıynsha memlekettik esepten shyǵarylǵan;
4. Kedendik tazartýdan ótken bolsa, ıaǵnı osyndaı talaptarǵa sáıkes kelse, qaýlyǵa saı kólik quraldaryna bastapqy memlekettik tirkeý úshin 200 000 teńge mólsherinde alym mólsherlemesi qoldanylady.
Sheteldik avtomobılderdi bastapqy tirkeýdiń kórsetilgen tártibi 2023 jylǵy 1 shildege deıin qoldanysta bolady jáne M1, M1G, M2, M2G, N1, N1G sanattaryndaǵy kólik quraldaryna, onyń ishinde bastapqy memlekettik tirkeý Qazaqstan Respýblıkasynyń azamattarynda júzege asyrylatyn basqarý tetigi oń jaqta ornalasqan kólik quraldaryna qoldanylady.
Bul rette kólik quraldaryn sanattar boıynsha jikteý Keden odaǵynyń «Dońǵalaqty kólik quraldarynyń qaýipsizdigi týraly» tehnıkalyq reglamentindegi (KO TR 018/2011) 1-qosymshaǵa sáıkes júzege asyrylady.