QR Premer-Mınıstri Álıhan Smaıylovtyń tóraǵalyǵymen ótken keńeste ortalyq memlekettik organdardyń jáne «Atameken» UKP basshylyǵynyń qatysýymen orta kásipkerlikti damytýdyń jańa tásilderi qaraldy.
Ulttyq ekonomıka birinshi vıse-mınıstri Tımýr Jaqsylyqov, 2023 jylǵy 1 naýryzdaǵy jaǵdaı boıynsha, respýblıkada 2 910 orta kásipkerlik sýbektisi bar ekenin baıandady, olardyń JİÓ-degi úlesi – 6,3%. Bul kásiporyndarda shamamen 380 myń adam jumyspen qamtylǵan.
VIII saılanǵan Parlamenttiń birinshi sesıasynyń ashylýynda Memleket basshysy aldaǵy jyldary orta bıznestiń básekege qabilettiligin arttyrý mindetin qoıdy. Osyǵan baılanysty QR UEM memlekettik satyp alý salasyn qosqanda, orta kásipkerlikke qatysty retteý rásimderin jeńildetý, salyq tóleýge yntalandyrý, ınvestısıalyq belsendilikti arttyrý, ákimshilik júktemeni azaıtý jáne orta kásipkerlikti qoldaýdy keńeıtý jóninde sharalar usyndy.
Premer-Mınıstr negizinen atalǵan tásilderdi maquldap, jańa bastamalardy ázirleý prosesine bıznes-qoǵamdastyqty belsendi túrde tartýdyń mańyzyn atap ótti.
«Biz bul usynystar boıynsha, birinshi kezekte bıznestiń usynystaryn eskere otyryp, jaqsylap jumys isteýimiz kerek. Olardy muqıat zerdelep, zańnamaǵa, sondaı-aq memlekettik organdardyń salalyq baǵdarlamalaryna tıisti ózgerister engizý qajet», – dedi Álıhan Smaıylov.
Indýstrıa jáne ınfraqurylymdyq damý mınıstri Murat Qarabaevtyń málimetinshe, búginde óńdeý ónerkásibi salasynda 501 orta bıznes kásiporny jumys isteıdi. Shaǵyn ónerkásip aımaqtaryn iske qosý, otandyq ınjenerlik-tehnıkalyq qyzmetkerlerdiń sheteldik zaýyttarda taǵylymdamadan ótýin qamtamasyz etý, bazalyq shıkizatty tereń óńdeýdi jandandyrý jáne t. b. sharalar arqyly osy kásiporyndardy damytý men jańa jobalardy júzege asyrý usynylady.
Qazaqstanda quny 10 trln teńgeden astam taýarlar men jumys jáne qyzmet túrlerin lokalızasıalaý áleýeti bar, olardyń bir bóligin orta bıznes kásiporyndary ıegere alady. Bul baǵytqa serpin berý úshin otandyq ónimderge tapsyrys berýshilerdiń tizbesin keńeıtý, sondaı-aq júıe quraýshy jáne kvazımemlekettik kompanıalarmen uzaq merzimge ofteık-kelisimsharttar bekitý tetikterin damytý josparlanyp otyr.
Keńeste sóz alǵan «Atameken» UKP tóralqa tóraǵasy Raıymbek Batalov ınvestısıalyq jobalarǵa sıfrlyq monıtorıń júrgizý múmkindikterimen tanystyryp, óńirlerdi damytýdaǵy basym salalardy memlekettik qoldaý sharalaryn kúsheıtýdiń artyqshylyqtaryna toqtaldy, sondaı-aq búdjetten qarjylandyrylatyn aýqymdy jobalardy iske asyrýǵa otandyq kásipkerlerdi belsendi túrde tartý qajettigin atap ótti.
Talqylaýdy qorytyndylaı kele, Premer-Mınıstr Memleket basshysynyń tapsyrmalary aıasynda orta kásipkerlikti damytý máselesine erekshe mán beretin ýaqyt kelgenin atap ótti.
«Orta bıznesti nyǵaıtý úshin barlyq baǵyt, atap aıtqanda, salyq boıynsha, ákimshilik jáne basqa da yntalandyrý quraldaryn qarastyrýymyz kerek. Bul jumyspen qamtylǵandar qataryn arttyrýǵa jáne kásiporyndar qyzmetkerlerin áleýmettik turǵydan qorǵaýǵa, ashyqtyqty keńeıtýge jáne jalpy ekonomıkamyzdy damytýǵa jáne ártaraptandyrýǵa yqpal etetin bolady», – dedi Álıhan Smaıylov.
Sonymen qatar Úkimet basshysy tamyz aıynyń sońyna deıin orta bıznesti qoldaýdyń keshendi baǵdarlamasyn ázirleýdi aıaqtap, ony Shaǵyn jáne orta kásipkerlikti damytýdyń 2030 jylǵa deıingi tujyrymdamasyna biriktirý múmkindigin qarastyrý qajettigin atap ótti.
«Qujat bıznestiń barlyq suranysyn qanaǵattandyrýy kerek. Bul jumysqa bıznestiń ózin, sarapshylar qaýymdastyǵyn, Parlament depýtattaryn, sondaı-aq jergilikti atqarýshy organdar men Prezıdent Ákimshiliginiń ókilderin belsendi túrde tartý qajet. Osy oraıda, orta kásipkerlikti sapaly damytý úshin jańa tásilderdi birlesip ázirleý, basymdyqtardy belgileý mańyzdy», – dep túıindedi Premer-Mınıstr.