Eýrazıa sımfonıalyq orkestri Túrkıa sahnasynda óner kórsetti
Senbi kúni Túrkıa Respýblıkasy Mádenıet mınıstrliginiń Prezıdenttik sımfonıalyq orkestriniń konserttik zalynda Eýrazıa sımfonıalyq orkestriniń Qazaqstan Respýblıkasy Táýelsizdiginiń 30 jyldyǵyna arnalǵan konserti ótti. Sharany Qazaqstannyń Túrkıadaǵy Elshiligi uıymdastyrdy, dep habarlaıdy Almaty-akshamy.kz.
QR Elshiliginen málim etkendeı, konsertte Qazaqstannyń halyq ártisi, eńbek sińirgen qaıratkeri, Qazaq Ulttyq óner ýnıversıtetiniń rektory, esimi álemge tanymal skrıpkashy Aıman Musaqojaeva óner kórsetti. Sonymen qatar, opera ánshisi Talǵat Musabaev, daryndy kompozıtor Rahat-bı Ábdisaǵyn óz ónerlerin tyńdarmanǵa pash etti. Konsert dırıjeri – Aıdar Torybaev.
Sondaı-aq, qazaqtyń qara dombyrasymen halqymyzdyń dástúrli kúılerin oryndaǵan «Shabyt» dombyrashylar orkestri kórermendi ónerlerimen tánti etti. Al Eýrazıa sımfonıalyq orkestri otandyq jáne álemdik mýzyka klasıkalaryn oryndap kópshiliktiń ystyq yqylasyna bólendi.
Saltanatty keshke Qazaqstan Respýblıkasynyń Túrkıadaǵy Elshisi Abzal Saparbekuly, Halyqaralyq TÚRKSOI uıymy Bas hatshysy Dúısen Qaseıinov jáne Ankaradaǵy dıplomatıalyq mısıa basshylary, dıplomattar, Túrkıa memlekettik organdar basshylary, ýnıversıtet oqytýshylary, zıaly qaýym, dıaspora, Ankarada bilim alyp jatqan stýdentter men BAQ ókilderi qatysty.
Konserttiń ashylý saltanatynda Elshi Abzal Saparbekuly sóz sóıledi.
«Ǵalamǵa ortaq til – mýzyka men óner qashanda adamdardyń basyn qosqan. Osy turǵyda óner Qazaqstan-Túrkıa qarym-qatynasyndaǵy basym baǵyttardyń biri bolyp tabylady. Shyndyǵynda, bizdiń halyqtarymyz ejelden ortaq qundylyqtardy biriktirip keledi. Qazaqtyń ulttyq mýzykalyq aspaby dombyranyń Túrkıada erekshe yqylaspen tyńdalýy baýyrlastyǵymyzdy odan ári nyǵaıtýda», - dedi ol.