Almaty qalalyq qoǵamdyq densaýlyq saqtaý basqarmasy kimge tumaýǵa qarsy ekpe tegin salynatynyn málim etti, dep habarlaıdy almaty-akshamy.kz
«Tumaýǵa qarsy ekpe jyl saıyn salynady. Qazir Almatyda tumaýǵa qarsy vaksına salýǵa daıyndyq jumysy júrgizilip jatyr. Tumaý – tynys alý joldarynyń jiti aýrýy. Tumaý kezinde bas aýyryp, adamnyń ımýnıteti álsireıdi»,- dep atap ótti basqarmadaǵylar.
Bıyl tumaýǵa qarsy ekpe salý 1 qazanan bastalady. Salynatyn «Grıppol plús» vaksınasy Reseıde óndirilgen.
«Birinshi kezekte táýekel tobyndaǵy turǵyndarǵa salynady. Vaksınasıa bastalǵanǵa deıin epıdemıologıalyq qyzmet emhananyń ýchaskelik qyzmetimen birlesip, aqysyz ekpe jasaý úshin táýekel tobynyń tizimin jasaıdy. Olar: sozylmaly aýrýy bar balalar, medısına qyzmetkerleri, júkti áıelder, jabyq tıptegi mekemelerdiń medısınalyq qyzmetkerleri (balalar úıi, mektep ınternaty, balalarǵa/múgedekterge arnalǵan mektep-ınternattary), qarttar men múgedekter úıleriniń kontıngenti», - dep atap ótti qalalyq densaýlyq saqtaý basqarmasy.
Ekpe saldyrar aldynda azamat óziniń ýchaskelik dárigeriniń tekserýinen ótedi, onyń ınfeksıalyq aýrý juqtyrǵandarmen baılanysta bolǵan-bolmaǵany jaıly suraıdy. Dene qyzýy ólshenip, eshqandaı qarsy kórsetkishter bolmasa, vaksına salynady. Aqyly negizde jeke medısınalyq uıymdarda tumaýǵa qarsy vaksınalaý júrgiziledi. Ol turǵyndardyń ótinishi boıynsha erikti túrde jasalady.