Oqıǵanyń tolyq mán-jaıy anyqtalýda.
Túrkistan oblysynyń polıseıleri joǵalǵan jasóspirim qyzdy Almatydan tapty, dep habarlaıdy Almaty-akshamy.kz Polisia.kz-ke silteme jasap.
Túlkibas aýdandyq polısıa bólimine jergilikti turǵyn aryzdanady. Áıeldiń aıtýynsha, eki kún buryn túngi ýaqytta 15 jastaǵy qyzy úıinen eshkimge eskertpesten shyǵyp ketip, osy ýaqytqa deıin oralmaǵan.
Jaqyndary ózderi izdegenimen, esh nátıje shyqpaǵan. Aqparat alysymen, polıseıler atalǵan jaıtty tirkep, birden izdestirý jumystaryna kiristi. Túlkibas aýdandyq polısıa bóliminiń ýchaskelik polısıa ınspektory Nurbol Esenbekov jasóspirim qyzdyń týystarymen birge izdeý jumystaryn júıeli júrgizdi. Jasóspirimniń barýy, habarlasýy múmkin dos-jaqyndarynan jaýap alyndy. Qoǵamdyq kólik pen taksı júrgizýshilerinen surastyryldy.
Sonyń nátıjesinde, 15 jastaǵy qyzdyń túngi ýaqytta taksımen Shymkent qalasyna jetip, odan keıin Almaty qalasyna ketkeni belgili boldy. Iaǵnı, polıseıler birneshe saǵat ishinde joǵalǵan qyzdyń júrgen jerin anyqtady. Ol Almaty qalasyndaǵy týǵan ápkesiniń úıine barǵan. Qazirgi tańda tártip saqshylary tabylǵan qyzdy úıine jetkizýmen aınalysýda.