Memleket basshysy Horvatıa Respýblıkasynyń Prezıdentine quttyqtaý jedelhatyn joldady, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaev Zoran Mılanovıchti jáne barsha horvat halqyn Horvatıa Respýblıkasynyń ulttyq merekesi – Memlekettilik kúnimen quttyqtady.
«Búginde Horvatıa Eýropa Odaǵynyń belsendi múshesi retinde óziniń turaqty damý, halyqtyń ál-aýqatyn jaqsartý jáne halyqaralyq qaýymdastyqtaǵy bedelin arttyrý jolynda eleýli jetistikterge qol jetkizip keledi. Osy rette memleketińizdiń ári qaraı qaryshtap damýyna, mereıiniń árqashan ústem bolýyna tilektespin. Astana men Zagreb arasyndaǵy mazmundy saıası dıalog pen dástúrli dostyqqa súıene otyryp, yntymaqtastyǵymyzdyń aıasy jyldan-jylǵa keńeıip jatqanyn rızashylyqpen atap ótemin. Birlesken kúsh-jigerimizdiń arqasynda elderimizdiń san qyrly baılanystary bolashaqta odan ári nyǵaıa túsetinine senimdimin», – dep jazylǵan jedelhatta.
Memleket basshysy Horvatıa Prezıdentiniń asa jaýapty qyzmetine tolaıym tabys, dostas horvat halqyna qut-bereke tiledi.