Olardyń jartysynan astamy tańdaý jasap úlgerdi.
Búgin Almaty qalasy Qylmystyq-atqarý júıesi departamentiniń №72 mekemesindegi (Tergeý ızolátory) tutqyndar da saılaý ýchaskesine kelip, daýys berýde, dep habarlaıdy Almaty-akshamy.kz
QR Qylmystyq-atqarý kodeksiniń 104-babynyń 3-bóliginde kózdelgendeı, sot úkimi boıynsha bas bostandyǵynan aıyrý oryndarynda ustalatyn sottalǵandardan basqa kúdiktilerdiń saılaýǵa qatysýǵa quqyqtary bar. Atalǵan sanatqa tergeý tutqynyndaǵylar men sottyń úkimi áli kúshine enbegen, jasy on segizge tolǵan azamattar jatady.
Parlament Májilisi jáne máslıhattary depýtattarynyń kezekten tys saılaýyna daıyndyq kezinde Almaty qalasy Túrksib aýdany ákiminiń sheshimimen Tergeý ızolátory ornalasqan aýmaq boıynsha №479 saılaý ýchaskesi qurylyp, ýchaskelik saılaý komısıasynyń músheleri bekitildi.
№72 mekemesinde saılaý ótkizý úshin 5 kabına jabdyqtalyp, úgit-nasıhat jumystary júrgizilgen bolatyn. Sonymen qatar saılaý ýchaskesine beınebaqylaý ornatylyp, atalǵan ǵımarattyń órt qaýipsizdigine komısıalyq túrde tekserý júrgizildi.
«Osyndaı mańyzy zor saıası naýqanǵa №72 mekemesindegi tergeý qamaýyndaǵylar da belsendi túrde atsalysty. 19 naýryz kúni tańǵy 7.00-den bastap tergeý ızolátoryndaǵy daýys berýge quqyly myńnan astam kúdikti tirkelgen. Olarǵa aldyn ala QAJ departamentiniń qyzmetkerleri Parlament májilisi men máslıhat depýtattyǵyna kandıdattarmen tanysý úshin aqparattyq materıaldar usynǵan bolatyn», – dedi saılaý ýchaskesiniń tóraǵasy mekeme bastyǵy, ádilet podpolkovnıgi A.Qapyshev.
Dál qazir tergeý ızolátoryndaǵy saılaý ýchaskesine saılaýshy retinde tirkelgen tutqyndardyń jartysynan astamy tańdaý jasap úlgerdi.