Onyń sebebin QR Ulttyq bank tóraǵasy aıtty.
2022 jyldyń qorytyndysynda teńge 7,1 paıyzǵa álsiredi. Bul týraly búgin Úkimet otyrysynda QR Ulttyq bank tóraǵasy Ǵalymjan Pirmatov aıtty, dep habarlaıdy Almaty-akshamy.kz QazAqparatqa silteme jasap.
«2022 jyly geosaıası jaǵdaıdyń shıelenisýi jáne jahandyq qarjy naryqtaryndaǵy qolaısyz ahýal ulttyq valútanyń dınamıkasyna teris áser etti. Naýryz aıynda teńge baǵamy 512,17 teńgege deıin álsiregennen keıin mamyr aıynda 414,79 teńgege deıin nyǵaıdy. Jyl qorytyndysy boıynsha teńge baǵamy 1 dollar úshin 462,66 teńgege deıin, ıaǵnı 7,1 paıyzǵa álsiredi», - dedi Ǵalymjan Pirmatov.
Onyń atap ótýinshe, 2022 jyly kvazımemlekettik sektor sýbektileriniń 5,1 mlrd dollar mólsherindegi valútalyq túsimdi satýy, respýblıkalyq búdjetke ulttyq qordan transfertterdi qamtamasyz etý úshin 4,3 mlrd dollar mólsherinde valúta satý, Ulttyq banktiń 1,4 mlrd dollar mólsherindegi valútalyq ıntervensıalary teńgege qoldaý kórsetti.
«Teńgeniń qubylmalylyǵy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtaǵy ahýalǵa baılanysty bolady. Ikemdi baǵam belgileý valúta naryǵyndaǵy jumystyń tıimdiligin arttyrýǵa jáne halyqaralyq rezervterdi saqtaýǵa yqpal etedi», - dedi UB tóraǵasy.