El táýelsizdiginiń qurdasy bolý men úshin úlken mártebe - Bekmahanbet Ábishev
1991 jyly týǵan balalar elimizdiń táýelsizdigimen birge dúnıege keldi. Búginde olardyń jasy 32 jasqa tolyp jetti. Qazirgi ýaqytta olar túrli mamandyqtardy ıgerip, elimizdiń damýyna úles qosýda. Olardyń qatarynda Qaraǵandy qalasyndaǵy №7 órt sóndirý bóliminiń qaraýyl bastyǵy Bekmahanbet Ábishev te bar, dep habarlaıdy almaty-akshamy.kz Qaraǵandy oblysy TJD baspasóz qyzmetine silteme jasap.
Táýelsizdiktiń qurdasy Bekmahanbet Ábishev bala kezinen órt sóndirýshi bolýdy armandaǵan. Sol armanyna qol jetkizý úshin mektepti támámdaǵan soń, Kókshetaý qalasyndaǵy tehnıkalyq ınstıtýtqa oqýǵa tústi.
Bekmahanbet 2012 jyldan bastap tótenshe jaǵdaılar júıesinde jumys isteıdi. 2017 jyldan bastap №7 órt sóndirý bóliminiń qaraýyl bastyǵy qyzmetin atqarady.
«Qansha qaýipti mamandyq bolǵanymen, ózim tańdap alǵan mamandyǵym ózime unaıdy. Óıtkeni, táýelsiz elimizde órt sóndirý salasyn damytýǵa memleket tarapynan barlyq jaǵdaı jasalǵan. Qazirgi zamanǵy tehnıkalar men qural-jabdyqtar órtti der kezinde aýyzdyqtap, sóndirýge múmkindik beredi. Munyń bári el táýelsizdiginiń arqasynda qol jetkizgen jetistikter. Sondyqtan, men úshin ekonomıkasy qaryshtap damyǵan, egemen eldiń ulany bolýdan asqan baqyt joq», -deıdi Bekmahanbet Ábishev.