Qurylys bıyl tamyz aıynda tolyǵymen aıaqtalmaq
QR Indýstrıa jáne ınfraqurylymdyq damý mınıstri Qaıyrbek Óskenbaev «MFA International» JSHS men «ATM Construction & Investment» JSHS zaýyttarynyń qurylysymen tanysty, dep habarlaıdy Almaty-akshamy.kz mınıstrliktiń baspasóz qyzmetine silteme jasap.
Vedomstvo basshysy birinshi aıaldaǵan «MFA International» JSHS zaýyty medısınalyq betperdeler men aýa tazartatyn respıratorlar óndiredi. «Astana – jańa qala» AEA ındýstrıalyq parki aýmaǵynda ornalasqan túrkıalyq kásiporynnyń qurylysy bıyl tamyz aıynda tolyǵymen aıaqtalmaq.
Jobanyń alǵashqy kezeńinde Z-267 serıaly qorǵanysh deńgeıi joǵary betperde shyǵarý kózdelse (jylyna 2,5 mln dana betperde), kásiporyn tolyq iske qosylǵanda Prestij (P-267V) serıaly medısınalyq maska óndirý josparlanǵan (jylyna 10 mln dana betperde). Jobanyń jalpy quny – 2,1 mlrd teńge.
Al tereze, medısınalyq qural-jabdyqtar, keńse jıhazdary men metal buıymdaryn óndiretin «ATM Construction & Investment» JSHS zaýyty 2022 jyldyń qyrkúıek aıynda iske qosylmaq. Kásiporyn «Astana – jańa qala» arnaıy ekonomıkalyq aımaǵynda ornalasqan. Jalpy quny 22 mlrd teńgeni quraıtyn zaýyt tolyq iske qosylǵanda 500 jańa jumys orny paıda bolady dep kútilýde. Joba jalpy aýmaǵy 17 myń sharshy metr aýmaqtaǵy bes negizgi óndiristik keshennen turady.
«QR IIDM basshysy ınvestorlarmen jáne qurylysqa jaýapty tulǵalarmen kezdesip, kásiporyndardyń halyq ıgiligine qyzmet etetinine senim bildirdi», delingen QR Indýstrıa jáne ınfraqurylymdyq damý mınıstrliginiń baspasóz qyzmeti taratqan aqparatta.