Narhoz ýnıversıtetiniń bolashaq jataqhanasynyń ornyna eskertkish tas qoıyldy
Jańa jataqhananyń eskertkish tasyn qalaý rásimine ýnıversıtet basshylyǵymen birge Qazaqstan Respýblıkasynyń Ǵylym jáne joǵary bilim mınıstri Saıasat Nurbek pen Almaty qalasy ákiminiń orynbasary Arman Qyryqbaev qatysty, dep habarlaıdy almaty-akshamy.kz
«Jyl saıyn mektep bitirýshiler sany artyp, jańa jataqhanaǵa degen qajettilik kún sanap artyp keledi. Narxoz ýnıversıtetiniń rezıdent emes stýdentterdi baspanamen qamtamasyz etý mindetin sátti oryndap kele jatqanyn atap ótkim keledi. Aldaǵy ýaqytta da osy bıik standart saqtalyp, jańa jataqhana stýdentterimizdiń tyń ǵylymı ıdeıalarynyń, jobalarynyń, jetistikteriniń bastaýyna aınalady dep senemin», - dedi Saıasat Nurbek óz sózinde.
- «Almaty qalasyn damytý baǵdarlamasynyń «Jol kartasy» aıasynda 2025 jyldyń sońyna deıin 12 myń, 2030 jyldyń sońyna qaraı taǵy 20 myń tósek-oryn qurý josparlanýda. Bul jataqhana tapshylyǵy máselesin tolyǵymen sheshedi. Jataqhana qurylysy boıynsha jumysty tıimdi úılestirý úshin qala ákimdigi mınıstrlikpen birlesip naýryz aıynda Jobalyq keńseni iske qosty. Búgin biz jańa Narxoz jataqhanasyna eskertkish tas qoıdyq. Jobanyń sátti júzege asýyna tilektespin», - dedi Almaty qalasy ákiminiń orynbasary Arman Qyryqbaev.
Jańa stýdentter úıi 3, 5 jáne 7 qabattan turatyn, jalpy aýdany 8661 sharshy metr bolatyn, 424 stýdent turatyn ǵımarattar kesheni bolady. Stýdentter eki nemese úsh adamdyq bólmelerde turady. Bólmeler jeke jýynatyn bólme, dýshpen jabdyqtalatyn bolady. Stýdentter úıiniń qurylys 2024 jyldyń qarashasynda aıaqtalady dep josparlanýda. Jobanyń quny 7 mıllıard teńgeden asady. Qurylysta ekologıalyq materıaldar qoldanylyp, aýmaq kógaldandyrylyp, jasyl jelektermen kómkeriledi.
- Bul ozyq álemdik tájirıbeni eskere otyryp salynǵan últra zamanaýı hostel bolmaq. As úıler, kovorkıngter men qosalqy bólmeler, al birinshi qabattarda medısınalyq pýnkt, kir jýatyn oryn, tehnıkalyq jáne komersıalyq úı-jaılar, erekshe qajettilikteri bar stýdentterge arnalǵan arnaıy jabdyqtalǵan bólmeler bar.2022 jyly bilim berýdiń ınfraqurylymdyq damýynda jańa standarttardy belgilegen negizgi kampýsymyzdy aýqymdy qaıta qurý aıaqtaldy. Jańa jataqhananyń salynýy ýnıversıtettiń 60 jyldyq mereıtoıyndaǵy odan ári damýyndaǵy mańyzdy kezeń, - dep atap ótti ýnıversıtet prezıdenti Mıras Dáýlenov.
Bolashaq ǵımarattyń qurylysy aldynda Narxoz ujymy kóp jumys atqardy. Halyqpen kezdesýler ótkizdi. Jataqhanadaǵy qabattardyń sany jaryqtandyrýǵa zıanyn tıgizbeıtin bolady. Sonymen qatar, bolashaq aleıany yqshamaýdannyń barlyq turǵyndary paıdalana alady. Kesilgen aǵashtardyń ornyna Almaty Botanıkalyq baǵynan alynǵan aǵashtar men butalar túrleriniń úlgilerinen jańa saıabaq otyrǵyzylady.
Aıta keteıik, bıyl Narxoz ýnıversıtetine 3500-den astam stýdent oqýǵa tústi. Nátıjesinde bir jyl ishinde memlekettik grant ıegerleriniń úlesi boıynsha «Narhoz» respýblıka boıynsha 33-orynnan 5-orynǵa jyljydy. Jańa jataqhana paıdalanýǵa berilse, ýnıversıtet stýdentterdi baspanamen qamtamasyz etý máselesin tolyǵymen sheship, barlyq stýdentterdi jaıly baspanamen qamtamasyz ete alady.