Naýryzdyń 19 kúni saǵat 18.00-de Abaı atyndaǵy Qazaq ulttyq opera jáne balet teatrynyń úlken sahnasynda Qazaq KSR-niń halyq ártisi, opera solısi, ustaz Shora Úmbetalıevtiń 80 jyldyǵyna arnalǵan merekelik konsert ótedi, dep habarlaıdy Almaty-akshamy.kz
Konsert shyǵarmashylyq joly jarty ǵasyrǵa jýyq urpaqqa úlgi-ónege bolǵan kórnekti oryndaýshynyń esimine taǵzym bolmaq. Shora Úmbetalıev Abaı atyndaǵy opera jáne balet teatrynyń úlken sahnasynda 40 jyl qyzmet etti.
«Teatrymyzda uzaq jyldar qyzmet etken qarıalardy eske alý erteden kele jatqan jaqsy dástúrge aınalǵan. Ánshi men oryndaýshynyń sanynda shek joq, al tulǵa - saýsaq sanarlyq. Tulǵa sahnaǵa shyqqanda, sahna túrlenip, bizdi birden basqa deńgeıge kóteredi. Shora Úmbetálıev dál osyndaı tulǵa edi. Onyń sırek bas - daýysy, vokaldyq jáne akterlik sheberligi kórermendi ózine tartyp, onyń qatysýynsyz birde-bir qoıylym sahnaǵa jol tartpady. Ol qazaq kompozıtorlarynyń shyǵarmalaryn óte belsendi túrde nasıhattady. Onyń partıalary – jeke dara týyndy, sondyqtan olardy teatrymyzdyń antologıasyna qosýǵa bolady», - deıdi Abaı atyndaǵy QazUOBT-niń qoıýshy-rejısseri, QR Eńbek sińirgen qaıratkeri Láılim Imanǵazına.
Shora Úmbetalıev somdaǵan beınelerde ánshiniń bıik ártistik daryny, psıhologıalyq tolǵanysy, sahnalyq sheberligi ornyn tapty. Onyń oryndaýyndaǵy úzdik partıalar – Syrttan («Abaı» A. Jubanov pen L. Hamıdı), Bekejan men Qojaq («Qyz Jibek» jáne «Er Tarǵyn» E. Brýsılovskıı), Janbota («Birjan Sara» M. Tólebaev), Taıshyq han («Alpamys» E. Rahmadıev), Keńgirbaı («Eńlik Kebek» Ǵ. Jubanova), Mylqaý men Abylaıhan («Ahan seri – Aqtoqty» jáne «Jumbaq qyz» S. Muhamedjanov), Mazamhan («Sadyr palýan» Q. Qojamıarov), Dıirmenshi («Sý perisi» A. Dargomyjskıı).
Kesh baǵdarlamasynda Abaı atyndaǵy QazUOBT opera trýppasynyń jetekshi solıseri men Astana-Operadan shaqyrylǵan qonaqtar Azamat Jyltyrgózov pen Talǵat Musabaevtyń oryndaýynda Shora Úmbetalıevtiń repertýarynan qazaq kompozıtorlarynyń shyǵarmalaryna arnalǵan arıalar shyrqalady.