Shetelge shyǵatyn qazaqstandyqtar Dúnıejúzilik densaýlyq saqtaý uıymy maquldaǵan vaksınalardy ektire alady. Sanıtarlyq-epıdemıologıalyq baqylaý komıtetiniń resmı ókili Erjan Baıtanaev atalmysh sanatqa qandaı azamattar kiretinin aıtty, dep habarlaıdy Almaty-akshamy.kz QazAqparatqa silteme jasap.
«Qazirgi tańda QR bas sanıtar dárigeriniń 2022 jylǵy 13 qańtardaǵy №2 qaýlysyna sáıkes, jekelegen jaǵdaılarda vedomstvoaralyq komısıanyń sheshimi boıynsha Dúnıejúzilik densaýlyq saqtaý uıymy maquldaǵan vaksınalarmen koronavırýs ınfeksıasyna qarsy vaksınasıanyń tolyq kýrsyn qaıta ótýge múmkindik beriledi», - dep túsindirdi Erjan Baıtanaev.
Aıtýynsha, mundaı múmkindik berilgen azamattar qaı sanatqa jatatynyna baılanysty túrli talaptardy oryndaýy qajet.
Sonymen, DDU tirkeýinen ótken vaksınalardy myna sanattaǵy azamattar qosymsha qabyldaı alady:
Halyqaralyq deńgeıde Qazaqstannyń atynan áreket etetin tulǵalar;
úkimetaralyq kelisimder men sharttar aıasynda, onyń ishinde akademıalyq utqyrlyq sheńberinde shetelde oqıtyn stýdentter jáne olardyń otbasy músheleri;
shetelge emdelýge jiberilgen naýqastar men olardy emdeýge ertip júretin adamdar.
Qajetti qujattar:
Ártúrli sebeptermen shetelge shyǵýy qajet bolǵan tulǵalar tıisti vedomstvoǵa sapar sebebin rastaıtyn qujatyn usynýy qajet.
Mysaly, shetelde bilim alýshylar QR Bilim jáne ǵylym mınıstrligine rastaýshy qujat usynady; shetelde emdelýge muqtaj naýqastar turǵylyqty jeri boıynsha medısınalyq uıymǵa nemese aýmaqtyq densaýlyq saqtaý basqarmasyna qujat ótkizedi.
Stýdentter úshin:
QR Bilim jáne ǵylym mınıstrligimen birge ázirlengen is-qımyl algorıtmi boıynsha:
«Bolashaq» halyqaralyq stıpendıasynyń ıegerleri jáne úkimetaralyq kelisimder men sharttardyń, onyń ishinde akademıalyq utqyrlyq sheńberinde shetelge oqýǵa jiberiletin adamdar, sheteldik oqý oryndaryna óz betimen túsken jáne úkimetaralyq kelisimder men akademıalyq utqyrlyq sheńberinde bilim alatyn stýdentter, Work and travel baǵdarlamasy boıynsha shetelge shyǵýdy josparlaǵan stýdentter men olardyń otbasy músheleri QR Bilim jáne ǵylym mınıstrligine jazbasha ótinish beredi;
Sol ótinishter negizinde mınıstrlik tizim jasap, QR Densaýlyq saqtaý mınıstrligine joldaıdy;
Densaýlyq saqtaý mınıstrligi bul tizimderdi medısınalyq uıymdarda vaksınalaýdy odan ári uıymdastyrý úshin óńirlerdiń densaýlyq saqtaý basqarmalaryna jiberedi;
Medısınalyq uıymdar stýdentterdi vaksınalaýdyń tolyq kýrsyn qaıtalap júrgizedi de, tizimderdi aqparattyq júıege málimetter engizý úshin Respýblıkalyq elektrondyq densaýlyq saqtaý ortalyǵyna (REDSO) beredi;
Koronavırýs ınfeksıasyna qarsy vaksınalaýdyń tolyq kýrsyn qaıtadan aıaqtaǵannan keıin jáne ekpe alǵany týraly derekterdi aqparattyq júıege eGov mobıldik qosymshasynda engizgennen keıin stýdentterdiń atyna elektrondyq vaksınalaý pasporty men qaǵaz nusqadaǵy vaksınalaý týraly anyqtama toltyrylady.
Shetelde emdelýshiler úshin:
Shetelge emdelýge jiberilgender men olardy ertip júretin adamdar medısınalyq uıymǵa Qazaqstannan tys jerde emdelý qajettiligin rastaıtyn qujat usynýy qajet. Osy qujattardyń negizinde medısına qyzmetkeri DDU maquldaǵan vaksınamen koronavırýs ınfeksıasyna qarsy vaksınalaýdy júrgizedi jáne derekterdi aqparattyq júıege engizedi.
KVI-ge qarsy vaksınalaýdyń tolyq kýrsyn qaıtadan aıaqtaǵannan keıin eGov mobıldik qosymshasynda emdelýshi men onyń saparlasynyń atyna vaksınalaýdyń elektrondyq pasporty men qaǵaz nusqadaǵy vaksınalaý týraly anyqtama toltyrylady.
Qazaqstannyń ókili retinde áreket etetin tulǵalar úshin:
Halyqaralyq deńgeıde Qazaqstannyń atynan áreket etý úshin shetelge shyǵatyn adamdar tıisti vedomstvoǵa nemese memlekettik organǵa (Bilim jáne ǵylym mınıstrligi, Mádenıet jáne sport mınıstrligi jáne basqa da mınıstrlikter) júginýi qajet. Ol organ máseleni vedomstvoaralyq komısıanyń (Qazaqstan Respýblıkasynyń aýmaǵynda koronavırýs ınfeksıasynyń taralýyn boldyrmaý jónindegi vedomstvoaralyq komısıa) qaraýyna shyǵarady.
QR Densaýlyq saqtaý mınıstrligi atalǵan vedomstvoaralyq komısıa hattamasynyń negizinde KVI-ge qarsy vaksınalaýǵa jatatyn adamdardyń tizimin shetelge shyǵatyn adamdardy vaksınalaýdy uıymdastyrý úshin aýmaqtyq densaýlyq saqtaý basqarmalaryna jiberedi.
Medısınalyq uıymdar álgi tizimdegi adamdarǵa vaksınalaýdyń tolyq kýrsyn qaıtalap júrgizedi jáne málimetterin aqparattyq júıege engizedi. KVI-ge qarsy vaksınalaýdyń tolyq kýrsyn qaıtadan aıaqtaǵannan keıin eGov mobıldik qosymshasynda atalǵan adamdardyń atyna vaksınalaýdyń elektrondyq pasporty men qaǵaz nusqadaǵy vaksınalaý týraly anyqtama toltyrylady.
Qazaqstandyqtar shetelge shyǵý úshin DDU maquldaǵan vaksınalardyń myna túrlerin qabyldaı alady:
«VeroCell», ınaktıvtendirilgen «Sinopharm».
«VeroCell»:
koronavırýsqa qarsy alǵash ret ekpe alyp turǵan qazaqstandyqtardyń bári saldyra alady;
al qaıtadan vaksınalaý kýrsyna (1 jáne 2 doza) joǵaryda atalǵan sanattaǵy shet elderge shyǵatyn qazaqstandyqtar paıdalana alady.
«VeroCell» eki dozaly vaksına. Shetelge shyǵý úshin 21 kúnnen keıin eki komponentti alý kerek. Densaýlyq saqtaý mınıstrligi ár eldiń óz talaptary bar ekenin eskertti. Mysaly, ekinshi komponentten keıin belgili bir kezeńdi kútý qajet degen sıaqty talaptar qoıylýy múmkin.