Baqylaýshylar tańǵy saǵat 07:00-den bastap elordada jáne el qalalarynda saılaý ýchaskeleriniń ashylýyna qatysty.
Saılaý ýchaskileriniń ashylýynda TMD Parlamentaralyq Assambleıasynyń baqylaýshysy Oleg Sepkın qatysty.
Ol áriptesterdiń pikirleri men óz tájirıbesin eskere otyryp, daýys berý ortalyqtarynda zań buzýshylyq faktileri tirkelmegenin atap ótti.
TMD Parlamentaralyq Assambleıasy baqylaýshysynyń aıtýynsha, delegasıa Parlamentte, saılaý komısıalarynda kezdesýler ótkizip, Konstıtýsıaǵa ózgerister engizýge qatysqan kóptegen mamandardyń pikirin bilgen.
«Memleket jyl basynda bolǵan oqıǵalardyń qaıtalanýyna jol bermeýdi ózine mindeti etip qoıdy. Bul týraly Prezıdent suhbatynda da aıtty. Qazaqstan basshylyǵynyń mundaı oqıǵalarǵa jedel jaýap berip, Konstıtýsıaǵa tez ózgerister daıyndaǵany jaqsy jáne durys sheshim boldy dep aıtýǵa bolady», — dedi Oleg Sepkın.
Ózbekstan Ortalyq saılaý komısıasynyń tóraǵasy Zaınıddın Nızamhodjaev delegasıa kúnniń birinshi jartysynda 10 — nan astam ýchaskege, onyń ishinde altaýy – Nur-Sultanda, beseýi – Aqmola oblysynda bolǵanyn habarlady.
«Biz adamdar joǵary belsendilikpen daýys berýge kelgenin kórdik, olardyń kópshiligi — jastar. Bul, jastardyń eldiń bolashaǵyna nemquraıly qaramaıtynyn kórsetedi. Bizdiń baqylaýshylarymyz túrli uıymdardyń quramynda tek Nur-sultanǵa ǵana emes, elimizdiń basqa da óńirlerine qatysady. Biz árqashan Qazaqstandaǵy saılaýǵa baılanysty barlyq is-sharalarǵa qatysamyz. Bul eki eldiń qarym-qatynasyn tek jaqsartady», — dedi Zaınıddın Nızamhodjaev.
Túrkıanyń joǵary saılaý keńesiniń tóraǵasy Aqqaııa Muharemniń aıtýynsha, olar bastapqyda Túrkistanǵa kelip, referendýmǵa daıyndyq barysyn zerttep, keıin 5 maýsym kúni Qazaqstan astanasynda bolǵan. Onyń aıtýynsha, uıymdastyrý jumystary joǵary deńgeıde júrgizildi. Sondaı-aq, baqylaýshy birneshe saılaý ýchaskelerine baryp, halyqtyń referendýmǵa degen qyzyǵýshylyǵyn óz kózimen kórgen.
«Árıne, referendým jıi qoldanylatyn bastama emes, biraq bul demokratıaǵa ákeletin qadam. Bul referendým Qazaqstannyń jáne búkil halyqtyń bolashaǵy úshin óte mańyzdy. Men aldyńǵy saılaýǵa da qatysqamyn. Osy joly aqparattyq tehnologıalardyń múmkindikteri sheber paıdalanylǵanyn aıtqym keledi. Bul óte jaqsy tájirıbe», — dep qosty Aqqaııa Muharem.