Endi avtokonstrýktorlardy tirkeý bastalady
İshki ister mınıstrligi 2022 jyldyń 1 qyrkúıegine deıin elge ákelingen sheteldik avtokólikterdi zańdastyrýdy jalǵastyryp jatyr, dep habarlaıdy Polisia.kz.
– 23 qańtardan bastap búgingi kúnge deıin aldyn ala onlaın tekserýden ótip, 200 myńǵa jýyq avtokólik ıesiniń ótinishi maquldanyp, onyń ishinde 100 myńnan astam kólik quraly zańdastyryldy. Sonymen qatar qazirgi ýaqytta İshki ister mınıstrligi qosalqy bólshekter retinde ákelingen avtokólikterdi zańdastyrý sharttaryn aıqyndaıtyn Úkimet qaýlysynyń jobasyn ázirledi. Joba Úkimettiń qaraýyna engizilip, oǵan kelesi aptada qol qoıylady dep kútilip otyr. Úkimet qaýlysyna qol qoıylǵannan keıin birinshi resmı jarıalanǵan kúninen bastap 10 kún ótkende ol qoldanysqa engizilip, sodan keıin biz avtokonstrýktorlardy tirkeýge alýǵa kirisemiz, – deıdi QR İİM Ákimshilik polısıa komıtetiniń tóraǵasy Qaısar Sultanbaev.