Norvegıalyq grosmeıster Magnýs Karlsen kóshtiń basyn eshkimge berer emes
Shahmattan otandyq qyzdar quramasy úzdikter tobynda. Búgin tartysty básekeniń úshinshi kúni ótip jatyr, dep habarlaıdy Almaty-akshamy.kz Almaty.tv-ge silteme jasap.
Búgin - ásem qala Almatyny dúbirge bólegen saıystyń úshinshi kúni. Qazaqstan shahmattan baıraqty báseke bastalǵaly beri qyzdar quramasynan úlken úmit kútedi. Óıtkeni, onda elimizdiń betke ustar Jansaıa Ábdimálik pen Dınara Sádýaqasova syndy oıynshylary bar. Olar saıysta sátti óner kórsetip keledi. Alamanda eki qyz 8 upaıdyń altaýyn qorjynǵa baılady. Ázirge olardyń aldyn jarty upaımen qytaılyq Tan Chjýnı́, reseılik Aleksandra Goráchkına jáne úndistandyq Savıta Shrı orap tur. «Qazaq eliniń abyroıyn arqalap álem chempıonatyna qosylǵan jas oıynshylardan kúter úmit kóp», - deıdi Qazaqstan shahmat federasıasynyń ókilderi.
«Týrnır aıaqtalýǵa jaqyn qaldy. Álem chempıonaty – psıhologıalyq maıdan alańy. Qazir oıyndaǵy jaǵdaı shıelenise tústi. Shahmatshylar ýaıymnan fıgýralardy túsirip alǵan sátter kezdesti. Bul olardyń emosıonaldy jaǵdaıynyń kórinisi ǵoı. Al tóreshilerge ondaı sátterde qatelikterge boı aldyrýǵa bolmaıdy. Sondyqtan, barlyǵyn jiti baqylaýda ustaý qajet. Jalpy, úsh kún ishinde zań buzylmady», – dedi shahmattan halyqaralyq tóreshi Arman Ǵabdýshev.
Erler arasyndaǵy alaman da qyzyp tur. Norvegıalyq grosmeıster Magnýs Karlsen kóshtiń basyn eshkimge berer emes. Ol alty oıyndy jeńispen aıaqtasa, úsh rette teń oınady. Ázirge Vladımır Fedoseev, rapıdten álem chempıony, ózbekstandyq Nodırbek Ábdisattarov, germanıalyq Vınsent Keımerdiń enshisinde 7 upaıdan bar. Odan keıingi satyda 6 jarym upaımen 6 oıynshy tur. Demek, olar da álem chempıony atanýǵa úmitker bola alady.
«Qarsylasym óte myqty boldy. Ókinishke qaraı, men jeńilip qaldym. Degenmen ishteı eshteńege ókinbeımin. Ózimdi shyńdadym, ózgelerdiń oıynyn kórdim. Bul - men úshin tájirıbe. Al jeńiske talasyp jatqandarǵa sáttilik tileımin. Eń myqty oıynshy jeńis tuǵyrynan kórinsin dep tileımin», – dedi shahmattan álem chempıonatyna qatysýshy Bendjamen Haldorsen (Norvegıa)
Aıta keteıik, jarystyń júlde qory - 1 mıllıon AQSH dollary. Al kil myqtylardyń esimi 30 jeltoqsanda málim bolady. Dál sol kúni chempıonattyń jabylý rásimi ótedi dep josparlanǵan. Álemniń ár túkpirinen kelgen sharshy taqtanyń sheberleri jalpy sany 4 medal jıyntyǵyna talasady. Almatyda shahmattan álem chempıonaty qala ákimdiginiń qoldaýymen ótip jatyr.