Túrksib aýdanynyń ákimi Baqytjan Aqjarov «Nurshashqan» shaǵynaýdanynyń turǵyndarymen kezdesti.
Aýdan turǵyndary elektrmen qamtý, jaryqtandyrý, jol qurylysy, qoǵamdyq kólik syndy ózekti máselelerdiń sheshimin surady.
Túrksib aýdany ákimdiginiń baspasóz qyzmeti habarlaǵandaı, qazirgi tańda elektr qýatyn turaqtandyrý maqsatynda «Tuzdybastaý» qosalqy stansasynyń qurylysy júrgizilip jatyr. Sonymen qatar, elektr jelilerin qaıta jańǵyrtý, 465 jańa tirek, 8 transformatorlyq jáne 1 taratýshy qosalqy stansıalardy ornatý jumystary júrgizilýde. Búgingi kúni jobaǵa sáıkes jalpy jumystyń 10 paıyzy oryndalǵan. Qurylys-montajdaý jumystary jylytý maýsymyna baılanysty toqtatylǵan.
Aýdan ákimi atalǵan jobany júzege asyrý shaǵyn aýdandy elektrmen qamtý sapasyn arttyrýǵa múmkindik beretinin jáne osy jyly elektrmen jabdyqtaý jobalary boıynsha jumystardy aıaqtaý josparlanǵanyn aıtty. Sonymen qatar, ol qazirgi tańda shaǵynaýdan 97 paıyzǵa jaryqtandyrylǵanyn jáne qalǵan úsh kósheni jaryqtandyrý jumystary sáýir aıynyń sońyna deıin aıaqtalatynyn habarlady.
Kezdesý barysynda apattyq jaǵdaılardyń saldarymen kúresi úshin qandaı jumys atqarylyp jatqany da aıtyldy. Aýdan basshysynyń habarlaýynsha, Almaty qalasy Energetıka jáne sýmen jabdyqtaý basqarmasynyń merdigerlik uıymy «Nuraı stroı» sý jelilerinde anyqtalǵan apattyq-qalpyna keltirý jumystaryn júrgizýde. Tótenshe jaǵdaı aıasynda Tbılısskaıa kóshesindegi káriz kolektoryn qalpyna keltirý jumystary bastalyp, aıaqtalý merzimi 2023 jyldyń mamyr aıyna josparlanǵan. Atalǵan jumys «Nurshashqan» shaǵynaýdanyn sapaly sýmen qamtamasyz etýge múmkindik beredi.
Aıta ketken jón, ınjenerlik jelilerdi tartý jobasynda 13 abonent (Meıirim kóshesi) qamtylmaǵan. Sondyqtan aýdan ákimdigi Energetıka jáne sýmen jabdyqtaý basqarmasyna qamtylmaı qalǵan aýmaqtardy jobalaýǵa ótinim berdi.
Sondaı-aq, Túrksib aýdanynyń ákimdigi Berdiqoja kóshesinde jol qurylysyn júrgizý úshin Jer qatynastary basqarmasyna jerdi satyp alý boıynsha suranys jibergen.
Aıta keterligi, shaǵynaýdanda Jaqut kóshesi boıynda saıabaq pen balalar alańyn abattandyrý máselesi qarastyrylýda. Jobany iske asyrý úshin «Búdjetke qatysý» baǵdarlamasy aıasynda aýdan ákimdigi Almaty qalasynyń Jer qatynastary basqarmasyna jer telimderin satyp alýǵa taǵy bir suranys jibergen.
Aýdan ákiminiń halyqpen kezdesýi barysynda ótken jyldyń jeltoqsan aıynda qurylysy bastalǵan 100 kelýshige arnalǵan dárigerlik ambýlatorıanyń 2023 jyldyń maýsym aıynda qoldanysqa beriletini josparlanyp otyrǵany aıtyldy.