Álem chempıonaty máresine jetti
Qazaqstandyq balýandar Qyrǵyzstan astanasy Bishkek qalasynda ótken sambodan álem chempıonatynda 3 kúmis, 7 qola júlde aldy, dep habarlaıdy Almaty-akshamy.kz QazAqparatqa silteme jasap.
13 qarashada álem chempıonaty máresine jetti. Qazaqstandyq balýandar 3 kúmis, 7 qola medal aldy. Nátıjesinde jalpy esepte 9-orynǵa jaıǵasty.
Jarystyń úshinshi kúninde jaýyngerlik sambodan 71 kelige deıingi salmaqta Áset Anarbaev fınalǵa shyǵyp, ızraıldik Tarıel Abbasovqa ese jiberdi.
Al 88 kelide Aıbek Sametaev jartylaı fınalda súrinip, qolany qaǵanat tutty.
Taǵy bir qolany áıelder arasynda Araılym Ábenova (80 keliden joǵary) aldy.
Eske salsaq, 12 qarashada Dildásh Quryshbaeva (72 keli), Arnur Qýataı (71 keli) men Mıras Ýálıev (58 keli) qola júldeger atandy.
Al 11 qarashada Qaıyrberdi Aıdynbaı (58 keli) men Asylbek Smaıylov (79 keli) kúmis júldeger bolsa, Gúldana Álmuhambetova (54 keli), Raıhan Mádı (98 keli) úzdik úshtikti túıindedi.
Álem birinshiliginiń nátıjesi jóninde ulttyq quramanyń bas bapkeri Birjan Imahanov bıylǵy kórsetkishti joǵary baǵalaıtynyn atap ótti.
«Bıylǵy kórsetkishti jaqsy dep baǵalaımyz. Sheshýshi sátte keı samboshylarymyzǵa sáttilik jetpeı jatty. Bıyl kóptegen jas sportshy quramaǵa endi qosyldy. Soǵan qaramastan olar júlde almasa da, úzdik bestikten kórinip jatyr. Mysaly, 22 jastaǵy Áset Anarbaev eresekter arasynda alǵashqy álem chempıonatyna keldi. Kelesi jyly Almaty qalasy eresekter, jastar men jasóspirimder arasyndaǵy Azıa chempıonatyn qabyldaıdy. Soǵan tyńǵylyqty daıyndalamyz», - dedi ol.