Senat Tóraǵasy Máýlen Áshimbaev Almaty qalasynda sarapshylarmen, qoǵamdyq uıymdardyń kóshbasshylarymen jáne zıaly qaýym ókilderimen kezdesti, dep habarlaıdy Almaty-akshamy.kz.
Kezdesýler barysynda «Jańa Qazaqstan» baǵdary, elimizde júrgizilip jatqan saıası jáne áleýmettik reformalar, sondaı-aq, Konstıtýsıaǵa ózgerister men tolyqtyrýlar engizý jóninde ótkiziletin respýblıkalyq referendýmge daıyndyq máseleleri keńinen talqylandy.
Konstıtýsıaǵa engiziletin túzetýler, eń aldymen, adam quqyqtaryn qorǵaýdyń barynsha tıimdi júıesin qalyptastyrýdy kózdeıdi. Elimizdiń ár azamaty júgine alatyn Konstıtýsıalyq sot qurý, ólim jazasynyń kúshin joıý jáne Adam quqyqtary jónindegi ýákildiń rólin arttyrý sıaqty naqty sharalar osy baǵyttaǵy mańyzdy qadamdar.
Kezdesý barysynda Qaragóz Súleımenova, Kenjehan Matyjanov, Murathan Shoqan, Ulyqbek Esdáýlet, Baqytjan Buqarbaı, Rınat Zaıytov, Bolat Ábdilmanov, Janar Aıjanova, Ómirbek Jubanıazov, Anar Fazyljan, Uljan Baıbosynova, Júrsin Erman, Aıgúl Janserikova, Sáýle Jırenshına, Sádýaqas Aǵytaev, Arman Júdebaev qoǵamdyq jurtshylyqty tolǵandyrǵan birqatar ózekti máseleni ortaǵa saldy.
Máýlen Áshimbaev engiziletin ózgerister Parlamenttiń saıası júıedegi rólin jáne onyń saılaýshylar aldyndaǵy jaýapkershiligin arttyratynyn da atap ótti.
«Parlament saılaýynda aralas majorıtarlyq-proporsıonaldy júıe engiziledi. Májilis quramynyń 30 paıyzy keıin bir mandatty okrýgter boıynsha saılana alady. Bul depýtattardyń óz saılaýshylary aldyndaǵy jeke jaýapkershiligin arttyrady. Saılaýshylar úshin saılaý aldyndaǵy ýádelerin oryndamaǵan depýtatty keri qaıtaryp alý múmkindigi týady. Senat óńirlerdiń múddelerin qorǵaıtyn Palataǵa aınalýǵa tıis. Qolǵa alynǵan ózgeristerge baılanysty Senattyń ókilettigi keńeıtiledi. Palata el Prezıdentiniń Konstıtýsıalyq sottyń jáne Joǵary Sot keńesiniń tóraǵalaryn taǵaıyndaýyna kelisim beredi», – dedi Máýlen Saǵathanuly.
Sondaı-aq Konstıtýsıaǵa engizilgen ózgeristerdiń nátıjesinde óńirlerdiń derbestigi de arta túsetini aıtyldy.
Joǵary palata Tóraǵasy jıyndy túıindeı kelip, Ata zańǵa engizý úshin usynylǵan ózgerister saıası básekelestikti kúsheıtýge jáne bılik monopolıasyn joıýǵa arnalǵanyn aıtty. Aıtylǵan usynystar zerdelenip, aldaǵy ýaqytta eskeriletinin nazarǵa saldy.