Qalanyń densaýlyq saqtaý júıesiniń tıimdiligin arttyrý – basty mindetterdiń biri.
Almaty ákimi Baqytjan Saǵyntaev qala aktıviniń otyrysynda Memleket basshysynyń Joldaýyn iske asyrý máseleleri boıynsha epıdemıologıalyq ahýaldy turaqtandyrý jáne qalanyń densaýlyq saqtaý júıesin damytý sharalary týraly aıtty, dep habarlaıdy Almaty-akshamy.kz
Qasym-Jomart Toqaev halyqqa Joldaýynda KVI pandemıasymen kúresý, eń aldymen halyqty vaksınalaý jáne profılaktıkalyq ekpeniń Ulttyq kúntizbesin oryndaý mindetterin qoıdy.
Almatyda 200-ge jýyq ekpe pýnktteri bar. Qazirdiń ózinde birinshi komponentpen 875 myń adam, ekinshisimen 748 myń adam vaksınalandy.
Vaksınalardyń úzdiksiz jetkizilýi qamtamasyz etildi. Qalaǵa barlyǵy 992 myń doza ákelindi. Baqytjan Saǵyntaev turǵyndar arasynda ımýndyq qabatty qalyptastyrý boıynsha jumysty jalǵastyrýdy tapsyrdy.
Almaty ákimi koronavırýstyq ınfeksıanyń taralý dınamıkasy týraly aıta kelip, ahýaldyń turaqtana bastaǵany týraly habarlady.
«Qabyldanǵan sharalardyń nátıjesinde Almatyda sanıtarlyq-epıdemıologıalyq ahýal turaqtana bastady. Dert deńgeıiniń tendensıasy tómendeýde. Búginde biz almatylyqtardyń táýliktik juqtyrý deńgeıiniń ótken aptalarmen salystyrǵanda 300 adamǵa azaıǵanyn baıqadyq», - dedi Baqytjan Saǵyntaev.
Sonymen qatar, jedel járdemge qońyraý shalý sany kúnine 4 myńnan 2,4 myńǵa deıin azaıdy. Naýqastardy aýrýhanaǵa jatqyzý kórsetkishi de eki ese tómendedi: tórtinshi tolqynnyń sharyqtaý shegindegi 800-den 400-ge jýyq adamǵa deıin. Búginde 9 myńǵa jýyq tósek-oryn qoldanysta, taǵy bir myńy rezervte. Infeksıalyq tósek-oryndardyń paıdalanylýy 55%-dy, reanımasıada 54%-dy quraıdy. Eger buryn úıdegi stasıonarda 14,5 myń adam bolsa, qazir olardyń sany 9,8 myń.
«Degenmen, aýyr zardaptar men ólimge ákeletin jańa indetter qaýpi áli de bar. Sondyqtan ınfeksıanyń aldyn alý, epıdemıologıalyq zertteýler júrgizý, juqtyrýdyń jappaı tizbegin boldyrmaý strategıalyq mindet bolyp qala beredi», - dep atap ótti Almaty ákimi.
Ol medısınalyq qyzmetterdiń barlyq spektrindegi sapaly qyzmettiń mańyzyn qadap turyp aıtty. AMSAK júıesi skrınıngtik jáne profılaktıkalyq tekserýlerdi jalǵastyrýy tıis.
Baqytjan Saǵyntaev qalanyń densaýlyq saqtaý júıesiniń ınfraqurylymyn jaqsartý jumystary jalǵasa beretinin aıtty. Sońǵy eki jylda, pandemıaǵa qaramastan, eki modýldik aýrýhana men 1080 tósek oryndy ınfeksıalyq aýrýhananyń fılıaly salyndy. Qaladaǵy 18 iri aýrýhanada ottegi stansıalary ornatyldy. Kárizdik aǵyndar men medısınalyq qaldyqtardy zalalsyzdandyrý júıeleri jańardy.
Ana men balanyń densaýlyǵyn qorǵaý úshin tıptik qabyldaý bólimi jáne taza bólmeler kesheni ári zamanaýı operasıalyq blogy, reanımasıa bólimi bar qurylys jobasy ázirlenýde. Sondaı-aq, jańa dárigerlik ambýlatorıalyq-emhanalyq mekemeler salý jospary jasaldy.
«Ákimdikke qarasty qalanyń medısınalyq uıymdarynda 19 myńnan astam medısına qyzmetkerleri jumys isteıdi. Medısınalyq kadrlardyń tapshylyǵyn azaıtý úshin jol kartasy júzege asyrylýda, 120 rezıdentti óte tapshy medısınalyq mamandyqtar boıynsha oqytý úshin jergilikti búdjetten qarjy bólindi», - dedi Baqytjan Saǵyntaev.