Qalada úndi shtamynyń paıda bolýyna baılanysty revaksınasıa qajet pe? Sońǵy jańalyqtardan keıin turǵyndar arasynda osyndaı zańdy saýal týyndady.
Bul suraqqa Almaty qalasy sanıtarıalyq-epıdemıologıalyq baqylaý departamentiniń basshysy Jandarbek Bekshın jaýap berdi, dep habarlaıdy Almaty-akshamy.kz.
«Revaksınasıa máselesi kóterilgen joq. Óıtkeni «Spýtnık V» vaksınasy barlyq belgili mýtasıalanǵan shtamdardy ınfeksıadan qorǵaıdy. Bul týraly vaksına ázirleýshilerdiń resmı málimdesi bar. Sonymen qatar QazVac vaksınasy úndi shtamyna tótep bere alady», - dedi Jandarbek Bekshın brıfıńte.
Onyń aıtýynsha, Almatyda koronavırýs ınfeksıasyn qaıta juqtyrýdyń 32 jaǵdaıy tirkelgen. 360 myńnan astam adam vaksına aldy. «Qalada ınfeksıany qaıta juqtyrýdyń 32 jaǵdaıy tirkeldi. «Spýtnık V» vaksınasynyń tıimdiligi 92% kórsetti. Imýnıtettiń qalyptasýy adamnyń aǵzasyna baılanysty. Birinde ımýnıtet bar, endi birinde álsiz», - dep tolyqtyrdy ol.
Buǵan deıin Almatyda 37 jastaǵy úı sharýasyndaǵy áıelden koronavırýstyń úndi shtamy tabylǵanyn habarlaǵan bolatynbyz.