«Áýezov úıi» ǵylymı-mádenı ortalyǵynyń zalynda Halyqaralyq teatr kúnine arnalǵan dóńgelek ústel ótti, dep habarlaıdy almaty-akshamy.kz
İs-shara M.O.Áýezov atyndaǵy Ádebıet jáne óner ınstıtýty, Teatr jáne kıno bóliminiń uıymdastyrýymen, T.Q.Júrgenov atyndaǵy Óner akademıasy, Ónertaný fakúlteti profesorlarynyń qoldaýymen uıymdastyryldy.
Dóńgelek ústelde belgili teatrtanýshy ǵalymdar A.Muqan, A.Erkebaı, Z.Islambaeva, M.Jaqsylyqova, M.Tashımova elimizdegi teatrlardyń baǵyt-baǵdary, jańalyqtary men bolashaǵy, teatr tóńiregindegi bolyp jatqan keleli máseleler jaıynda sóz saralady.
«Orta Azıa men Túrki tildes baýyrlas eldermen salystyra aıtsaq elimizdegi teatr ındýstrıasynda úlken ózgerister bolyp, kóptegen is-sharalar ótkizilip jatyr. Festıváldik bıografıamyzdyń aıasy keńip, respýblıkalyq, halyqaralyq teatr festıválderiniń sany ósýde. Sapasy ár qıly, ár teatr oblystyq, aımaqtyq teatr merekelerin kóbeıtip, ótken 2023 jyldyń ózinde jıyrma bir teatr festıvaliniń ótýi qýantarlyq jaıt bolyp otyr. Teatrlardyń sany kúrt kóbeıýde, memlekettik teatrdyń sany jetpisten astam, al táýelsiz teatrlar elýge jýyqtady. Ár oblysta jastar laboratorıalary quryldy. Olar teatr festıválderine qatysyp óz ónerlerin pash etýde. Inklúzıalyq teatrlardyń paıda bolýy, Almatydaǵy «Transforma», «Deıstvıe býkvalno», Astanadaǵy «Qanattylar», oblystardaǵy teatr-laboratorıalary kezinde bir rettik joba bolady degen qasań pikirlerdi joıdy. Sonymen qatar oblystyq teatrlardyń janynan qýyrshaq trýppalary ashylyp jumys isteı bastaǵany árıne qýantady. Bul sandyq kórsetkish bolǵanmen sannan sapa týyndaıtyny taǵy bar deıdi ǵylym kandıdaty A.Erkebaı. Osy rette qýyrshaq teatryn zerttep júrgen teatrtanýshy M.Tashımova óz oıyn bylaısha sabaqtady. Drama teatrlarynyń janynan ashylyp jatqan qýyrshaq trýppalarynyń kóbeıip jatqany qýantqanmen, shyǵarmalyq daıyndyqtan ótpegeni, kemeli kelip qýyrshaq teatrynyń qazanynda maqsat-múddelerine saı shyńdalmaǵany qýyrshaq teatr festıválderinde birden kózge uryp kórinip qaldy, – deıdi M.Áýezov atyndaǵy Ádebıet jáne óner ınstıtýtynyń ǵylymı qyzmetkeri, teatrtanýshy Mánshúk Tashımova.
Jalpy alǵanda búgingi zamanaýı teatrdyń tóńiregindegi izdenister men jańalyqtar, sonymen birge tolyp jatqan máseleler dóńgelek ústeldiń mazmunyna aınaldy. Qonaq retinde shaqyrylǵan teatr jáne kıno akteri Ábilqasym Shomanov, «Bolat medıa» korporasıasynyń prezıdenti, jýrnalıs Batyr Bolat, Qaraqalpaqstannyń Berdaq atyndaǵy mýzykalyq teatrynyń bas rejıseri Muhtar Rımov, jas teatrtanýshy, magıstrler T.Embergenov, J.Turmaǵambetter sóz alyp, teatrdaǵy akterlik oıyn, tehnıkalyq mamandardyń jetispeýi, teatr jaıly bilimdi shet elderde jetildirý sıaqty oılaryn ortaǵa saldy.
Teatrtanýshy M.Amangeldi dóńgelek ústelge qatysýshylarǵa búgingi qazaq teatrynyń zamanaýı kelbetiniń aýany qaıda bet túzep jatqany jaıynda saýal tastady. Akterlik oıyn men rejıssýrada nendeı jańalyqtar bar? Aýyzǵa ilinip júrgen rejıserler ózin-ózi qaıtalap jatqan joqpa?! Dramatýrgıanyń barysy qandaı bolý kerek, qaıda bet aldy, teatrlar repertýarlyq saıasatty qalaı ustanǵany jón? – degen saýaldar tóńireginde teatrtanýshy mamandar óz oılaryn ortaǵa saldy. M.Jaqsylyqova: «Dástúrdi saqtaı otyryp jańǵyrtý» ıdeıasyn usyndy. Ol búgin óte mańyzdy másele, árbir sýretkerdiń (dramatýrgti, rejıserdi, akterdi aıtqym keledi) kez-kelgen dástúrge degen azamattyq pozısıasy bolýy kerektigin tilge tıek etti. Teatrlarda ulttyq dúnıelerimizdi jańǵyrtýǵa, qaıta qaraýǵa degen betburys baıqalady. Ulttyq dúnıelerimizdiń baǵalanyp otyrǵanynyń ózi qazirde rýhanı qundylyqtarǵa mán berý jáne jastardyń sanasyna quıýǵa, óz túp-tamyryna, salt-dástúrine qaıtýǵa degen talpynysty baıqatady
