Qaraǵandy oblysynda karantın kezinde toı ótkizýge tyıym salýdy elemegen sheneýnik jumystan bosatyldy. Bul týraly óńir basshysy Jeńis Qasymbek onlaın rejıminde ótken aparattyq keńeste málimdedi.
«Búginnen bastap jer qatynastary basqarmasynyń basshysy Maqsutov Qalel Muqataıuly karantındi óreskel buzýy, ıaǵnı, pandemıa kezinde toı sharalaryn uıymdastyrýyna baılanysty qyzmetinen bosatyldy. Taǵy da eskertemin: mundaı zańsyzdyqtar úshin jaza óte qatal bolady. Munda memlekettik qyzmetshiniń qyzmettik etıkasynyń barlyq normalary buzylǵan. Oblysta koronavırýs ınfeksıasyna qarsy is-qımyl boıynsha júrgizilip jatqan úlken jumysty qunsyzdandyrmańyzdar. Turǵyndardyń kóńilin qaldyrmańyzdar. Mártebelerińiz nemese jumys ornyna qaramastan áreketterińizge jaýap beresizder!», – dedi oblys ákimi.
Sondaı-aq, Jeńis Qasymbek monıtorıń tobynyń múshelerin prınsıptilikke shaqyrdy.
«Sizder bireýdiń múddesi úshin jumys isteý úshin emes, azamattardyń densaýlyǵyn qorǵaý úshin qurylǵansyzdar! Osyndaı is-sharalardy toqtatyp, jarıa etińizder. Sizder ózderińiz baqylaý kameralaryna qaraı otyryp jumys isteıtinderińizdi aıtqan bolatynsyzdar. Sondyqtan muqıat qarańyzdar. Salynǵan tyıym barlyǵyna birdeı», – dep atap ótti oblys ákimi.
Oqıǵa 7 tamyzda bolǵan. «109» nómirine «Arısta» meıramhanasynda jappaı is-shara ótkizilip jatqany týraly habarlama kelip tústi. Oqıǵa ornyna Qaraǵandy qalasynyń polısıa, sanepıdbaqylaý jáne ákimdik qyzmetkerlerinen turatyn mobıldi top shyqty. Mekemeniń janynda kóptegen kólikter bolǵandyqtan jáne meıramhananyń ózinde 400-ge jýyq adam bolǵandyqtan, aýmaqty qorshaý úshin polısıanyń qosymsha narády shaqyryldy.
Karantın rejımin buzý faktisi boıynsha SEQ qyzmetkerleri akt rásimdedi. Mekeme ıesine jáne is-sharalardy uıymdastyrýshylarǵa aıyppul salynady.
Ótken demalys kúnderi oblys ortalyǵy men Temirtaý qalasynyń basqa da mekemelerinde karantın rejıminiń óreskel buzýshylyqtary anyqtaldy.
Esterińizge sala keteıik, Qaraǵandy oblysy «qoıý qyzyl» aımaqta ornalasqan. Óńirde kún saıyn Covid-19 juqtyrýdyń myńǵa jýyq jańa jaǵdaıy tirkeledi. Oblystyń bas sanıtar dárigeriniń qaýlysymen shekteýler kúsheıtildi.