Qazaqtyń qaharman qyzy
Kóktemniń alǵashqy kúni Elordadan bastaý alǵan Roza Baǵlanovanyń 100 jyldyq mereıtoıy búgin Syr óńirinde jalǵasyn tapty, dep habarlaıdy Almaty-akshamy.kz.
Qyzylorda qalasynda Nartaı Bekejanov atyndaǵy Qyzylorda oblystyq qazaq akademıalyq mýzykalyq drama teatrynda Qazaqstannyń Halyq ártisi, Halyq qaharmany Roza Baǵlanovanyń 100 jyldyq mereıtoıyna arnalǵan «Qazaqtyń qaharman qyzy» atty merekelik konsert ótti.
Bul merekelik konsert oblys ákimi Nurlybek Nálibaevtyń konsertti ótkizýge kelgen elimizdiń tanymal óner juldyzdarymen kezdesýimen bastaldy.
Aımaq basshysy Halyq qaharmany, qazaqtyń bulbuly atanǵan Roza Baǵlanovanyń izin jalǵap, ánderin nasıhattaýda óner ıeleriniń aıryqsha orny bar ekenin jetkizip, iltıpatyn kórsetti.
«Aıtýly konsertke qazaqtyń án ónerin asqaqtatyp, ult mádenıetin kóterýge eńbek sińirip júrgen ózderińizdiń qatysyp, óner kórsetýlerińiz Syr jurtshylyǵy úshin úlken maqtanysh dep bilemin. Búgin Syr elinde án men óner merekesi ǵana emes, ult rýhanıatynyń jańǵyrǵan kúni dese bolady. Óner kóshindegi sizder turǵanda án padıshasy, qazaqtyń qaharman qyzy Roza Baǵlanovanyń esimi urpaqtan-urpaqqa jalǵasa beretini sózsiz», - dedi Nurlybek Nálibaev.
Konsertte Qazaqstannyń halyq ártisi Nurǵalı Núsipjanov, Sulýshash Nurmaǵanbetova, Altynbek Qorazbaev, Gúlnár Sıqymbaeva, Jeńis Seıdýllauly, Jeńis Ysqaqova, Igor Blagodarnyı, Aıgýl Imanbaeva, Asqat Úrpekov, Shaba, Nurlan Alban, Baýyrjan Isaev, Zarına Jakenova syndy ártister men Qurmanǵazy atyndaǵy Qazaq ulttyq orkestri óner kórsetti.
Óner maıtalmandary Nurǵalı Núsipjanov, Altynbek Qorazbaev pen Sulýshash Nurmaǵanbetova Roza Baǵlanovanyń óner álemindegi qoltańbasyn sóz etip, Syr jurtynyń óner ıelerine degen qurmeti úshin alǵysyn jetkizdi.
Munan soń, óńir basshysy ult óneriniń maıtalmandaryna Syr halqy atynan syı-sıapat jasap, qurmetin kórsetti.
Aıta keteıik, qazaq óneriniń birtýar ánshisine arnalǵan bul keremet án keshi Mádenıet jáne sport mınıstrliginiń uıymdastyrýymen ótti.
Syr óńiri – halyq degen ár talantyn tóbesine kótere alatyn, ultym degen ul-qyzdaryn ulyqtaı alatyn óristi óńir. Oǵan osy mereıtoıda kýá boldyq. Syr topyraǵynan túlep ushqan óner ıesi, án padıshasy Roza Tájibaıqyzynyń ánderin saǵynǵan kórermender óner juldyzdary men konsertti uıymdastyrýshylarǵa degen qurmet qoshemetin aıamady. Án keshi óte joǵary deńgeıde ótti.