Ulttyq palata turyp qalǵan konteınerlerdiń derekterin jınap jatyr
Logıstıka máseleleri áli de nazarda qalyp otyr. Qytaı Halyq Respýblıkasynan júkti temirjol arqyly tasymaldaýdyń sheshimi tabyldy. Bul týraly Almaty-akshamy.kz «Atameken» Ulttyq kásipkerler palatasynyń baspasóz qyzmetine silteme jasap habarlaıdy.
«Atameken» Ulttyq kásipkerler palatasy júkti kólikpen tasymaldaý máselesin sheshýge qatysty usynystardy pysyqtap jatyr.
Qazir Qytaı-Qazaqstan shekarasynda kólik quraldarynyń keptelisi tirkelmegen. Alaıda, júkti jetkizý merzimi qysqarmady. Qytaı aýmaǵynda (porttar, stansıalar), sonyń ishinde Koreıa, Japonıa, Ońtústik-SHyǵys Azıa elderinen tranzıtpen kelgen eki myńnan asa konteıner tur.
Ulttyq palata turyp qalǵan konteınerlerdiń derekterin jınap jatyr. «Qazaqstan temir joly» UK» AQ jáne QHR temirjol ókilderimen kelissózder barysynda qytaı tarapy qazaqstandyq konteınerlerdi jedel jóneltýge járdemdesetin aıtty. Qazaqstannyń Indýstrıa jáne ınfraqurylymdyq damý mınıstrligi men Syrtqy ister mınıstrligi prosesti jedeldetýge qosyldy.
Bul rette shekarada qalyp qoıǵan júk kólikteriniń elektron kezegi máselesi áli sheshilmegen.
«COVID-19 pandemıasy bastalǵan kezde Qytaı bıligi shekteýler engizdi. Sonyń saldarynan ótkizý beketteriniń jyldamdyǵy aıtarlyqtaı tómendep ketti. Eger pandemıaǵa deıin «Nur joly» ótkizý beketi táýligine 200-ge deıin kólik quralyn ótkizgen bolsa, qazir táýligine nebári 10-15 kólik ótedi», – dedi UKP Logıstıka jáne tasymaldaý departamentiniń dırektory Murat Amrın.
Júkti jetkizý merzimi – kásipkerler úshin ózekti másele. Óıtkeni bul bıznestiń qalypty jumysyna keri áser etedi. Munyń ishinde shıkizattyń keshigýi, kelisimshart aıasyndaǵy qatynastardy buzý qaýpi jáne basqa máseleler bar. Ulttyq palata beketterden ótý prosedýralaryn qalaı ońtaılandyryp, jeńildetýge bolatynyn túsiný úshin memlekettik organdarmen birlesip, taldaý júrgizip jatyr.
Ulttyq palata mamandary sheshim retinde QHR úkimetine qoldanystaǵy shekteýlerdi alyp tastaý jáne pandemıaǵa deıingi shekaradan ótý prosedýrasyn qaıtarýdy surap, hat joldaýdy usyndy.
Prosesterdi sıfrlandyrý da máseleni sheshýi múmkin. Mysaly halyqqa «bir tereze» qaǵıdaty boıynsha qyzmet kórsetýge múmkindik beretin halyqaralyq elektron platformany engizý josparlanǵan.