"Aq-Jol-avtojol" baqylaý-ótkizý beketi arqyly ótýine ruqsat berilmegen
Qyrǵyzstan parlamentiniń eki depýtaty Emıl Jamgyrchıev pen Shyńǵys Aıdarbekov qyrǵyz-qazaq shekarasynan ótkizilmedi, dep habarlaıdy Almaty-akshamy.kz aikyn.kz-ke silteme jasap.
Depýtattar Qazaqstanǵa jeke sharýalarymen kelmek bolǵany naqtylandy. Alaıda olardyń "Aq-Jol-avtojol" baqylaý-ótkizý beketi arqyly ótýine ruqsat berilmegen. Keıbir málimet boıynsha, ol jerge arnaıy qyzmet ókilderi jetip, ekeýin de Ulttyq qaýipsizdik memlekettik komıtetine alyp ketken.
24.kg aqparat agenttiginiń málimetinshe, Kempir-Abad sý qoımasyn Ózbekstanǵa berýge qarsy daýys bergenderdiń qatarynda Emıl Jamgyrchıev pen Shyńǵys Aıdarbekov bar. Ekeýi de "Aláns" fraksıasynyń músheleri.
Keıin parlament depýtaty Elvıra Sýrabaldıeva Twitter paraqshasynda Emıl Jamgyrchıevtiń Ulttyq qaýipsizdik memlekettik komıtetinen bosatylǵanyn habarlady.
Onyń aıtýynsha, áriptesteri Emıl Jamgyrchıev pen Shyńǵys Aıdarbekov Qordaıdaǵy (Qazaqstan) ótkizý beketi arqyly jerleýge bara jatqan.